سندھ حکومت کی کراچی سے نفرت ظاہر ہوگئی

حالیہ بارشوں نے متعلقہ اداروں خصوصاً سندھ حکومت کی کراچی سے نفرت ظاہر کردی ہے۔ بارش سے قبل گندگی اورکچرے کے ڈھیروں کا معاملہ سندھ حکومت کے کھاتے میں گیاہے کیونکہ کچرا اٹھانے کی ذمہ داری اب سندھ سالڈ ویسٹ مینجمنٹ بورڈ کی ہے۔ اس کے بعدکوئی شہری ادارہ کچرا اٹھانے کا ذمہ دار نہیں ہے۔ یہ الگ بات ہے کہ ایس ایس ڈبلیو ایم بی اب تک فعال نہیں ہوسکا ہے مگراس کی ذمہ داری بھی سندھ حکومت پرعائد ہوتی ہے ابھی کچرے کا معاملہ جاری تھا کہ محکمہ موسمیات نے کراچی میں تیز اور دھواں دھار 3 روزہ بارشوں کی پیش گوئی کردی۔ اس صورت حال میں بلدیہ عظمیٰ کراچی کی ذمہ داری تھی کہ وہ کراچی کے برساتی نالوں کی صفائی کاکام بارشوں سے قبل شروع کرادیتی تاہم ایسا نہیں ہوا۔ اس حوالے سے جب میئر کراچی وسیم اختر سے سوال کیاگیاتو انہوں نے واضح جواب دیا کہ سندھ حکومت ہی نالوں کی صفائی کے لئے فنڈز فراہم کرتی ہے تاہم یہ کام ہمارے انتخابات کے بعدمگر حلف برداری سے قبل سندھ حکومت نے اپنے تعینات کردہ ایڈمنسٹریٹرز کے ذریعے کرایاتھا اورجون2016ء میں43کروڑ70 لاکھ روپے سندھ حکومت نے ایڈمنسٹریٹر کے ایم سی کوجاری کئے تھے۔ اس سے نالوں کی صفائی کیوںنہ مکمل کی جاسکی یا وہ رقم کہاں گئی اس کا جواب تو سابقہ ایڈمنسٹریٹر ز سے سندھ حکومت کو لیناچاہئے۔ یہ ایک بات ہے کہ سب جانتے ہیں کہ اس رقم کی کس طرح بندر بانٹ کی گئی جبکہ نالے آج بھی کچرے سے بھرے ہیں۔ کراچی کے28بڑے برساتی نالوں میں زیادہ ترسیوریج کی لائنیں کراچی واٹراینڈ سیوریج بورڈ نے ملا رکھی ہیں اورسیوریج کے ساتھ سالڈ ویسٹ بھی آجاتاہے مٹی اورغلاظت کے ساتھ ساتھ کچرا بھی انہی نالوں میں ڈالاجاتاہے۔جس کے باعث یہ نالے بندہوجاتے ہیں۔ اگرمان بھی لیاجائے کہ گزشتہ سال نالوں کی صفائی مکمل کی گئی توپھرکیا وجہ ہے کہ ایک سال گزرنے اورہماری باربار کی یاددہانیوں کے باوجود سندھ حکومت نے نالوں کی امسال صفائی کیلئے رقم فراہم نہیں کی۔میئرکراچی وسیم اختر کا کہناتھا کہ وزیراعلیٰ سندھ فرماتے ہیں کہ جواختیارقوانین میں ہیں وہ سب میئرکوحاصل ہیں اورفنڈز کی فراہمی پرکہا جاتاہے کہ جو شیئرہیں اس شہر کے وہ دے رہے ہیں توجناب شیئر یعنی اوزیڈ ٹی کی مد میں قوانین کے مطابق حصہ نہیں دیا جارہا نہ ہی اس شہر سے کروڑوں روپے یومیہ ٹیکس وصول کرکے اس کے منصوبوں کے لئے فراہم کئے جارہے ہیں۔ ہمارے اور ڈی ایم سیز کے تمام دئے گئے منصوبے وزیراعلیٰ نے مسترد کردیئے۔ پھر کہتے ہیں کہ یہ شہر ہمارا ہے اورہم اس شہر کی ترقی چاہتے ہیں بارباراس شہر کے حقوق پرڈاکہ مارکرمحرومیوں کی طرف دھکیلا جارہا ہے اور اب توسندھ حکومت کراچی کوکچرے کے ڈھیروں کے بعدبرساتی ریلوں اورسیوریج کے پانی میں ڈبونا چاہتی ہے۔ ہم اپنے محدود اختیارات اورمحدود ترین وسائل کے ساتھ میدان میں اترے ہوئے ہیں اورلوگوں کے درمیان رہ کر اس شہر کے ڈپٹی میئر،ضلعی چیئرمینوں اور ارکان اسمبلی نے ڈوبتے کراچی کے شہریوں کوبارشوں میں ریلیف فراہم کیاہے۔ وسیم اختر نے بتایا کہ بلدیہ عظمیٰ کراچی ،کراچی کوفنڈ ز صوبائی اوروفاقی حکومتیں فراہم کرتی رہی ہیں مگراس مرتبہ دونوں حکومتوں کی جانب سے سرد مہری سے کراچی کی حالت بدترہوتی جارہی ہے۔28بڑے نالوں کی صفائی کوئی آسان کام نہیں رہا ا سکے لئے بڑی رقم کی ضرورت ہے اوراگربرساتی نالوں کی مکمل صفائی نہ ہوئی تو پھرشہر کراچی اورشہریوں کی امداد کا وقت بھی میسر نہیں ہوگا۔اس سلسلے میں سندھ حکومت کے سیکریٹری بلدیات رمضان اعوان نے بتایا کہ میئر کراچی نے50کروڑ روپے نالوں کی صفائی کیلئے مانگے ہیں اوراس حوالے سے اعلیٰ سطح پرمشورہ ہواہے جس میں سندھ حکومت کا موقف ہے کہ ہم نے بلدیہ عظمیٰ کراچی کوجولائی2016ء میں43کروڑ 70لاکھ روپے جاری کئے تھے۔ پہلے میئر کراچی اس کا حساب دیں پھر 50کروڑ طلب کریں۔ سیکریٹری بلدیات کا کہناتھا کہ نالوں کی6اسکیمیں بھی تھیں کے ایم سی نے وہ بھی بناکرنہیں دیں۔ انہوں نے کہاکہ جب تک کے ایم سی اورڈی ایم سیز مل کرنالوں کی صفائی کا منصوبہ نہیں بناتیں یہ مسئلہ حل ہوتا دکھائی نہیں دیتا۔یہ مل کرایک کمیٹی بنائیں جونالوں کی صفائی کی مکمل نگرانی مکمل پاور کے ساتھ کریں توکرپشن کم ہوسکتی ہے اور سرکاری رقم ضائع ہونے کے بجائے عوام کوریلیف فراہم کرنے میں لگے گی۔ اس سوال پرکہ شہر میں سینکڑوں گٹروں کے ڈھکن غائب ہونے سے حادثات کے علاوہ سیوریج لائنوں میں کچرا بھررہا ہے اورگٹرابل رہے ہیں۔ جواب میں سیکریٹری بلدیات رمضان اعوان کاکہناتھا کہ سند ھ حکومت کے پاس اتنی استطاعت نہیں کہ ہم گٹرکے ڈھکن بھی رکھیں۔ ہرسال اس مد میں رقم فراہم کی جاتی ہے مگر ناقص ڈھکن بنائے جانے کے سبب ٹوٹ جاتے ہیں یا چوری ہوتے ہیں۔ رمضان اعوان کا کہناتھا کہ شہریوں کوگٹر کے ڈھکنوں کی نگرانی کرناچاہئے تاکہ وہ چوری نہ ہوں اوراس سلسلہ میں آگاہی مہم کی ضرورت ہے۔ سیکریٹری بلدیات کا کہناتھا کہ کراچی کی ترقی کیلئے70ارب روپے صوبائی اے ڈی پی میں رکھے جاتے ہیںجبکہ سندھ کی لوکل کونسلز کے لئے60ارب روپے مختص ہیں ہمیں اسکیمیں دیں ہم ترقیاتی کام کروائیںگے۔سندھ حکومت اوربلدیہ کراچی کے درمیان جاری جھگڑے میں شہریوں کوشدید مشکلات اورپریشانیوں کا سامناہے۔ آج بھی شہر کے مختلف علاقوں میں برساتی پانی جمع ہے اورشہرمیں سینکڑوں گٹر کے ڈھکن نہ ہونے کے باعث بارش کے پانی کے ساتھ کچرا اورمٹی بھی سیوریج سسٹم میں جاکرپھنس گئی ہے اورشہر کے سینکڑوں مقامات پر گٹرابل پڑے ہیں۔ ادھرکراچی واٹراینڈ سیوریج بورڈ کا بھی یہی کہناہے کہ فنڈز کی کمی کے باعث ہم گٹروں کے ڈھکن نہیں بنوارہے جبکہ فنڈز کی کمی کے باعث ہی نئی سیوریج اورپانی کی لائنیں نہیں ڈال رہے،اداروں کے ان سب مسائل کا سامنا کراچی کے ڈھائی کروڑ سے زائد عوام کوکرنا پڑرہا ہے۔

متعلقہ خبریں