کشمیری قیادت نظر بند

ریاض احمدچودھری

قابض حکام نے میر واعظ عمر فاروق کو سعدہ کدل سرینگر میں منعقدہ ایک تقریب میں شرکت سے روکنے کے لئے آج ایک بار پھر گھر میں نظربند کردیا ہے۔ میرواعظ کو سعدہ کدل میں قرآنک ریسرچ انسٹی ٹیوب کے زیر اہتمام تقسیم انعامات کی ایک تقریب میں مہمان خصوصی کے طور پر مدعو کیا گیا تھا۔ بھارتی وزیر داخلہ امیت شا کے دورے سے قبل غیر قانونی طور پر بھارت کے زیر تسلط جموں و کشمیر میں سکیورٹی کے نام پر پابندیاں مزید سخت کردی گئی ہیں۔ وادی کشمیر میں سڑکوں پر متعدد ناکے قائم کیے گئے ہیں اور اچانک تلاشی کی مہم جاری ہے۔ بھارت کے غیرقانونی طورپر زیر تسلط جموں وکشمیر میں کل جماعتی حریت کانفرنس نے کہا ہے کہ بھارت نے تحریک آزادی کشمیر کو دبانے کے لئے علاقے میں خوف ودہشت کا ماحول قائم کر رکھا ہے اور کالے قوانین نافذ کرکے حریت رہنمائوں اور کارکنوں کو نشانہ بنا رہا ہے۔ کل جماعتی حریت کانفرنس کے ترجمان ایڈووکیٹ عبدالرشید منہاس نے سرینگر میں جاری ایک بیان میں کہا کہ مقبوضہ جموں و کشمیر میں آرمڈ فورسز سپیشل پاورز ایکٹ ، پبلک سیفٹی ایکٹ، غیرقانونی سرگرمیوں کی روک تھام کے قانون یو اے پی اے اور دیگر کالے قوانین کے تحت حریت رہنمائوں، کارکنوں اور عام کشمیریوں کے گھروں پر چھاپے مارے جا رہے ہیں، ان کے جائیدادیں ضبط کی جارہی ہیں، انہیں گرفتار اور نظربند کیا جارہا ہے اور دیگر مظالم ڈھائے جارہے ہیں۔ یہ کارروائیاں عالمی برادری کیلئے چشم کشا ہیں۔ بھارت کی ایجنسیاں اور وزارت داخلہ اپنے زرخرید ایجنٹوں کے ذریعے حریت کانفرنس کے خلاف پروپیگنڈا کرکے اسے بدنام کرنے کی کوشش کررہی ہے لیکن وہ اپنے مذموم عزائم میں کبھی کامیاب نہیں ہوں گے۔ وہ ہر قسم کے ظالمانہ ہتھکنڈے آزمانے کے باوجود کشمیری عوام کے جذبہ حریت کو دبانے میں ناکام رہے اور کبھی کامیاب نہیں ہوں گے۔
بھارت کے غیر قانونی طور پر زیر تسلط جموں و کشمیر میں جنگلات میں آگ لگنے کے واقعات میں خطرناک حد تک اضافہ دیکھنے میں آیا ہے اور صرف گزشتہ گیارہ دن میں جنگلات میں آگ لگنے کے 94 سے زائد واقعات رپورٹ ہوئے ہیں جس سے ماحولیاتی تحفظ اور قدرتی آفات سے نمٹنے کی تیاری کے حوالے سے شدید خدشات پیدا ہوئے ہیں۔ ترال میں ایک دارالعلوم میں آتشزدگی کے ایک واقعے میں ایک بارہ سالہ طالب علم جاں بحق اور چھ دیگر زخمی ہو گئے۔ ہفتے اور اتوار کی درمیانی شب دارالعلوم شاہ ہمدان میں شدید آگ بھڑک اٹھی۔ دریں اثنا بھارتی پنجاب کے شہر جالندھر کے علاقے سوڈل میں ایک 51 سالہ کشمیری شال فروش غلام حسن لون موٹرسائیکل کی زد میں آکر جاں بحق ہو گیا۔غیرقانونی طورپر بھارت کے زیر قبضہ جموں وکشمیرمیں کل جماعتی حریت کانفرنس نے کہاہے کہ بھارت نے تحریک آزادی کشمیر کو دبانے کے لئے علاقے میں خوف ودہشت کا ماحول قائم کررکھاہے اور کالے قوانین نافذ کرکے حریت رہنمائوں اورکارکنوں کو نشانہ بنا رہا ہے۔ بی جے پی اور آر ایس ایس نے وقف بل کے ذریعے بھارت اور مقبوضہ جموںو کشمیر میں مسلمانوں اور وقف بورڈز کی جائیدادوں پر قبضہ کرنے کی سازش کی ہے تاکہ ان کی ثقافت اور تشخص کو مٹایا جاسکے جس کی ہم شدید مذمت کرتے ہیں۔
پناہ گزینوں کے لیے اقوام متحدہ کے ادارے یو این ایچ سی آر کا بھارت میں انسانی حقوق کی خلاف ورزیوں پر اظہار تشویش کیا ہے۔یو این انسانی حقوق کمشنر وولکرترک نے مقبوضہ کشمیر کی صورت حال پر کہا کہ دنیا میں بیس سے زائد تنازعات جاری ہیں جن میں مسئلہ کشمیر بھی شامل ہے۔بھارت میں قدغن والے قوانین کا استعمال کرکے کشمیریوں کے حقوق دبائے جا رہے ہیں۔ بھارتی ریاست منی پورمیں تشدد اور بے دخلی کے مسئلے کے حل کیلئے بھی بات چیت پر زور دیا، کشمیری نمائندگان نے بھی انسانی حقوق کونسل اجلاس میں بھارتی اقدامات پر مداخلت کا مطالبہ کیا ہے۔ صحافیوں اور انسانی حقوق کے کارکنوں کو ہراسانی کا سامنا ہے، اور اس کے نتیجے میں بے جا گرفتاریاں اور شہری آزادیوں کی کمی دیکھنے میں آ رہی ہے۔
کشمیر انسٹی ٹیوٹ آف انٹرنیشنل ریلیشنز کے چیئرمین الطاف حسین وانی نے بھارت کے جمہوری دعووں اور کشمیری عوام پر جابرانہ قوانین کے نفاذ کے درمیان تضاد پر روشنی ڈالتے ہوئے کہا کہ یو اے پی اے جیسے قوانین خوف و ہراس پھیلانے اور اختلاف رائے دبانے کے لیے استعمال ہو رہے ہیں۔آل پارٹیز حریت کانفرنس آزاد جموں و کشمیرکے سیکریٹری جنرل ایڈووکیٹ پرویز شاہ نے بھی یو این ایچ آرسی کی بھارت میں انسانی حقوق کی صورتحال پر تشویش کو خوش آئند قرار دیا اور کہا کہ بھارت کو اقوام متحدہ میں جمہوریت کا نقاب اترنے پر شرمندہ ہونا چاہیے۔کشمیر کے وفد نے اجلاس میں اعلان کیا کہ وہ اقوام متحدہ کے ہائی کمشنر سے کشمیر میں انسانی حقوق کی صورتحال پر ایک تیسری رپورٹ کی درخواست کریں گے تاکہ عالمی برادری کو بھارت کے مظالم سے آگاہ کیا جا سکے۔
بھارت کے غیرقانونی طورپر زیر تسلط جموں وکشمیر میں بھارتی پولیس نے ضلع کپواڑہ میں 2کشمیریوں کو گرفتار کر لیا ہے۔دونوں کو ضلع کے علاقے کرالہ پورہ میں ایک ناکے پر گرفتار کیا گیا۔ گرفتار افراد کی شناخت امتیاز احمد نجار اور منیر احمد شیخ کے ناموں سے ہوئی ہے۔ قابض حکام نے دعوی کیا ہے کہ ان کے موبائل فونز سے آزادی کے حق میں پوسٹرز برآمد ہوئے ہیں اور ان سے 3 موبائل فون بھی ضبط کیے گئے ہیں۔ حکام نے بتایا کہ دونوں افراد کے خلاف مقدمہ درج کیا گیا ہے۔

متعلقہ خبریں