خوشحالی کی جھوٹی کہانی اور عوام

رفیق پٹیل

پی ڈی ایم کی سابقہ اور موجودہ حکومت کے دوران مسلسل سیاسی اور معاشی عدم استحکام نے ثابت کردیا ہے کہ عوام کی بھاری اکثریت کی خواہشات اور امنگوں کے خلاف ملک کے نظام کو چلانے اور ملک کی سب سے بڑی جماعت کو کچلنے کے نتائج سے ملک کا سیاسی ،معاشی اور سماجی ڈھانچہ ٹوٹ پھوٹ کا شکار ہورہا ہے ،جس سے ملک کی سا لمیت اور بقا کو بھی خطرات ہوسکتے ہیں۔ جدید دور میںمقبول سیاسی جماعت کے خلاف طاقت کے ناجائز استعمال کو عالمی سطح پر سخت تنقید کا سامنا کرنا پڑتا ہے۔ دنیاکے اہم مما لک باریک بینی سے اس طرح کی کارروئیوںکا جائزہ لیتی ہے ۔اعلیٰ عدلیہ اور قانون دان طبقے میں بھی اس بات پر تشویش پائی جارہی ہے کہ 26 ویں آئینی ترمیم نے عدلیہ کو مفلوج کردیا ہے اور انتظامیہ خود عدلیہ کی جگہ لے رہی ہے ۔در اصل موجودہ آئینی ترمیم کے ذریعے عملی طور آئین کی کوئی حیثیت نہیں رہی ہے ۔موجودہ نظام کے تحت جب بھی نئے انخابات ہوں گے ،حکمراں جماعت کی مرضی کے مطابق قائم کردہ الیکشن کمیشن ہی کرائے گا یا موجودہ الیکشن کمیشن کے عہدیداروں کی مدت ملازمت میں توسیع کردی جائے گی۔ نتائج بھی اپنے مرضی کے ریٹرننگ افسر کریںگے ۔یہی جماعتیں مزید بھاری اکثریت سے کامیاب ہوں گی۔ عمر رسیدہ اراکین اور وزراء ریٹائرڈ ہوکر اپنی اولادوں کواسمبلیوں میں بھی لے آئیں گے۔ بڑھتے برھتے یہ سلسلہ اسمبلیوں سے حزب اختلاف کے خاتمے تک پہنچ جائے گا۔ اس انتظام کے تحت حکمراں جماعت کاہر امیدوار من پسند ریٹرننگ افسر کی تعیناتی چاہے گا۔ حکمراں جماعت بھی اپنے امیدواروں کی خواہشات کی تکمیل کرے گی ۔یعنی ایک ایسا نظام تشکیل دینے کی کوشش کی گئی ہے جو شمالی کوریا سے مماثلت رکھتا ہو، حکمران نسل در نسل حکومت کرتے رہیں اور ان پر کسی قسم کی روک تھام یا گرفت نہ ہو ۔ہم شمالی کوریا نہیں بن سکتے ہیں ۔یہ آدھا تیتر اورآدھا بٹیر ہے۔ اس طرح کے غیر منصفانہ نظام میں اندرونی انتشار بھی جنم لیتا ہے ،ملک تباہی کی جانب گامزن ہوتا ہے۔ حیرت کی بات یہ ہے کہ نواز شریف کے قریبی ساتھی جو ٹی وی پروگرام میں مبّصر بھی ہیں ،ا پنی” دانش مندانہ ” رائے دیتے ہوئے فرمارہے تھے کہ ان کی نظر میں نئے انتخابات ایک ممکنہ حل ہیں جو نسبتاً منصفانہ ہوں (یعنی اس میں بھی دھاندلی ہو) ان کا کہنا تھا کہ پی ٹی آئی کے پی کے ، پنجاب اور سندھ میں بھی مقبول ہے، اس لیے منصفانہ انتخابات میں موجودہ برسراقتدار جماعتوں کا خاتمہ ہوسکتاہے ۔ان وجوہات کی بنیاد پر منصفانہ انتخابات نہیں کرائے جا سکتے ۔دوسرے الفاظ میں پہلے یہ طے کرنا ہوگا کہ کس جماعت کو کتنی نشستیں دی جائیں۔ حالانکہ جمہوریت سے منصفانہ انتخابات کو علیحدہ کر دیا جائے تو جمہوریت کی بنیاد ہی ختم ہوجاتی ہے اور جعلسازی پر مبنی نظام قائم ہوجا تا ہے ۔شفّاف جمہوری عمل اورمنصفانہ انتخابات سے ہی عوام کا حکومت پر اعتماد قائم ہوتا ہے۔ مشہور انگریزی محاورہ ہے کہ ” جمہوریت کی خرابی کا علاج مزید جمہوریت ہے” ۔شفّاف جمہوری عمل میں خراب کارکردگی کی وجہ سے بعض سیاسی جماعتوں کو عوام رد کر دیتے ہیں۔ اس طرح بہتر سے بہتر نمائندے سامنے آجاتے ہیں۔ مغربی جمہوریت کے نظام میںترقّی یافتہ ملکوں نے اسی طرح ترقّی کی تھی اس کے برخلاف بنگلہ دیش میں جب انتخابی دھاندلی کے ذریعے اپنے مخالفین کو کچلنے کے اقدامات کیے تو اس کے نتیجے میں وہاںبر سراقتدار عوامی لیگ کو عوام نے باہر نکال دیا ۔عوامی لیگ تقریباً ختم ہوگئی ہے ۔پاکستان کا سیاسی منظر نامہ دیکھ کر سیاست کی معمولی سوجھ بوجھ رکھنے والا بھی یہ اندازہ لگا سکتاہے کہ عوام کی حمایت سے محروم موجودہ حکمرانی کامصنوعی نظام ملک میں جاری سیاسی اور معاشی بحران میں اضافہ کر سکتا ہے ۔ اس بحران میںکمی کا دور دور تک امکان نہیں ہے ۔عوامی حمایت کے بغیر ا ستحکام کی توقع کو دیوانے کاخواب کہنا اگر درست نہیں تواور کیا کہا جاسکتا ہے۔
نامعلوم وجوہات کے سبب شاید بعض دانشور اپنے مرتبے اور مقام کی پرواہ کیے بغیر موجودہ بحران کو بھی استحکام اور خوشحالی کہتے ہیں ایسی جھوٹی کہانیوں پر شاید وہ خود بھی یقین نہیں رکھتے ہوں گے ۔ایسی جھوٹی تسلّیوں پر عوام کسی صورت یقین نہیں کریں گے۔ آج حالات اس نہج تک پہنچ گئے ہیںکہ حکمران جماعتوںکے رہنما اور فیصلہ ساز یا تو بے بس ہیں یا زمینی حقائق کی پرواہ نہ کرتے ہوئے بڑھتے ہوئے طوفان کے سامنے ر یت میں منہ چھپارہے ہیں یا ان کے سارے اندازے ہوائی قلعوں کی طرح ایسے خیالی پلائو کی طرح ہیں جو ان کے مصنوعی اقتدار کو لے کر ڈوب رہا ہے۔ شاید ان کے پاس دولت کے انبار بھی ہوں گے، معاملات مزید خراب ہوئے تو اس دولت سے بھی انہیں محرومی کا سامنا ہو سکتا ہے ،کوشش جاری ہے کہ مو جودہ حکمران وقتی طور پر اپنے بچائو کا راستہ تلاش کر لیں ۔اس کے باوجود اقتدار کے خاتمے کے بعد دنیا کے کسی کونے میں انہیں پردہ پوشی کی زندگی گزارنی پڑے گی۔ ایسا محسوس ہوتا ہے کہ جو جال انہوں نے عوام کو قابو اور بے بس کرنے کے لیے بچھایا تھا ،اس میں خود پھنس گئے ہیں۔اب اس سے نکلنے کا راستہ نظر نہیں آتا۔ یہ بات بھی حکمرانوں کی سمجھ سے بالاتر ہے کہ آخر عمران خان کیوں راضی نہیں ہورہے ہیں ۔وہ یہ بھی سمجھنے سے قاصر ہیں کہ عمران خان کی رہائی تو معمولی بات ہے شاید وہ بے اختیار وزیر اعظم بننے کی پیش کش بھی قبول نہیں کریں گے۔ وجہ یہ ہے کہ عمران خان عمر قید یا سزائے موت کے لیے تیا ر ہیں لیکن موجودہ نظام کو قبول کرنے کواس وقت تک تیار نہیں جب تک مغربی طرز سے قریب پاکستانی معاشرے سے مطابقت رکھنے والی جمہوریت اورقانون کی حکمرانی پر مشتمل نظام قائم نہیں ہوتا ،جوغیر جانبدارانہ منصفانہ انتخابات اور انسانی حقوق کے علاوہ آزاد عدلیہ کی ضمانت دے۔ یہی وجہ ہے کہ وہ سب سے پہلے اپنے کارکنوں کی رہائی چاہتے ہیں۔انہیں واضح نظر آرہا ہے جیل کا ایک ایک لمحہ انہیں مقبول سے مقبول تر بنارہا ہے۔ قید کی زندگی ان کی قدرو منزلت میںقومی اور بین الاقوامی سطح پر مسلسل اضافے کاباعث ہے جبکہ بر سراقتدا ر گروہ کا ہر گزرنے والا لمحہ ان کے لیے عوامی نفرت کا باعث بن رہاہے۔ عمران خان دیو بنتے جا رہے ہیں اور ان کے مخالفین کاقد اس قدر کم ہورہا ہے کہ وہ بونے بن رہے ہیں ۔ ان کے خلاف اقدامات ان کے لیے طاقت کا ٹیکہ بن چکے ہیں۔ حکمران جماعتوں کے عہدیدار سہمے ہوئے نظر آنے لگے ہیں۔ شاید بیرونی دبائو سے ان کے ہاتھ پیر پھول گئے ہیں۔ جھوٹ کو سچ ثابت کرنے کی کوشش میں دیے جانے والے بیانات پر خود انہیں بھی اعتماد نہیں ہے ،ان کا لہجہ اور چہروں کے تاثرات بھی ان کا ساتھ نہیں دے رہے ہیں۔ یہ تصوّر کر لینا کہ ملک میں انصاف کا خاتمہ کرکے انسانی حقوق کو معطّل کرکے انتظامیہ کو قانون اور آئین سے بالا کرکے استحکام آسکتا ہے ،بیمار ذہن کی عکّاسی ہے ۔جابرانہ اور آمرنہ قسم کے نظام کے ذریعے ملک چلانے کے بے حد نقصانات ہوچکے ہیں۔اب عالمی دبائو بھی بڑھ رہاہے ،اس وقت سبق حاصل نہ کیا گیاتو نقصانات میں اضافہ روکنا ممکن نہ ہوگا ۔پاکستان کوعوامی حمایت کے ذریعے کسی بھی المیے سے بچاناہوگا۔عوام کواختیار دیا جائے تو وہ تیز رفتا معاشی ترقّی سے ملک کو بحران سے نکا ل لیں گے ۔ا نتخابی دھاندلی سے تیار کردہ جھوٹ کے نظام سے نجات میں ہی ملک کی بھلائی ہے۔

متعلقہ خبریں