... loading ...
... loading ...
اسلام آباد: وفاقی وزیر خزانہ و محصولات سینیٹر محمد اورنگزیب نے کہا ہے کہ پاکستان اورچین کے درمیان اسٹرٹیجک اور اقتصادی تعلقات قائم ہیں،دونوں ممالک کے درمیان دوطرفہ تعلقات میں آئندہ برسوں میں مشترکہ فائدے کے بے شمار مواقع موجود ہیں جن سے استفادے کی ضرورت ہے،امریکا بھی پاکستان کا اہم تجارتی شراکت دار ہے۔
ان خیالات کا اظہار انہوں نے منگل کو چین میں پاکستان کے سفیرخلیل ہاشمی اورسٹیٹ بینک کے گورنر جمیل احمد سے ملاقاتوں کے دوران کیا،اس موقع پر وزیراعظم کے معاون خصوصی برائے امور خارجہ سید طارق فاطمی بھی موجود تھے۔
چین میں پاکستان کے سفیر سے ملاقات کے دوران وزیر خزانہ نے پاکستان کی اقتصادی صورتحال میں اہم پیشرفت خصوصا کاروباری برادری اور سرمایہ کاروں کے بڑھتے اعتماد پر تفصیل سے روشنی ڈالی۔
انہوں نے اقتصادی سفارتکاری اور تعاون کی اہمیت پر زور دیتے ہوئے کہا کہ پاکستان کی بڑھتی ہوئی معیشت میں اقتصادی شراکت داریوں کی مزید ضرورت ہے۔سفیر نے وزیر خزانہ کو پاکستان اور چین کے درمیان دوطرفہ تعلقات کو مزید مستحکم کرنے کے حوالے سے اپنی جاری کوششوں سے آگاہ کیا۔
انہوں نے دونوں ممالک کے درمیان تجارت، سرمایہ کاری اور اقتصادی تعاون کو بڑھانے کے لیے ہونے والی اعلی سطح کی ملاقاتوں،وفود کے تبادلوں اور معاہدوں کی تفصیلات سے بھی آگاہ کیا۔ملاقات کے اختتام پر دونوں رہنماں نے پاکستان اور چین کے درمیان اسٹرٹیجک اور اقتصادی تعلقات کو مزید گہرا کرنے کے عزم کا اظہار کیا اور اس بات پر اتفاق کیا کہ دونوں ممالک کے درمیان دوطرفہ تعلقات میں آئندہ برسوں میں مشترکہ فائدے کے بے شمار مواقع موجود ہیں جن سے استفادے کی ضرورت ہے۔
گورنرا سٹیٹ بینک کے ساتھ ملاقات میں گورنر نے پاکستان کے مالیاتی ڈھانچے کو مستحکم کرنے کے لیے جاری اور منصوبہ بند اقدامات کا تفصیلی جائزہ پیش کیا۔ انہوں نے زر مبادلہ کی شرح کو مستحکم کرنے اور غیر ملکی زرمبادلہ کے ذخائر کو بڑھانے کے لیے کی جانے والی کوششوں کو اجاگر کیا۔
بینکنگ کے شعبے کی مجموعی کارکردگی اور اس کے ملکی معیشت میں اہم کردار پر بھی تبادلہ خیال کیا گیا جس میں فریقین نے اس شعبے کے اقتصادی ترقی میں معاونت کرنے والے اہم کردار کو تسلیم کیا۔
ملاقات میں سمندر پار پاکستانیوں کی ترسیلات زر کے بہا کو مزید بڑھانے کے اقدامات پر بھی بات چیت کی گئی اور دونوں طرف سے اس اہم ذریعہ زر مبادلہ کو مزید مستحکم کرنے کے لیے تعاون کے عزم کا اظہار کیا گیا۔
