بھارتی فوج میں میرٹ کی دھجیاں!

ریاض احمدچودھری
۔۔۔۔۔۔۔۔۔۔

۔۔۔۔۔۔۔۔۔۔۔۔۔۔۔۔۔۔۔۔۔

بھارتی وزیراعظم نریندر مودی نے الیکشن سے قبل ووٹ بٹورنے کے لیے سابق فوجیوں کو ‘ایک رینک، ایک پینشن ‘ کے سبز باغ دکھائے تاہم الیکشن میں کامیابی کی بعد ریٹائرڈ بھارتی فوجیوں سے بھی دھوکا کیا اور آنکھیں پھیرلیں۔اب تک 5 ہزار سے زائد ریٹائرڈ بھارتی فوجی مودی سرکار کو احتجاج کے طور پر اپنے تمغے واپس کر چکے ہیں۔نریندر مودی نے وزیراعظم بننے سے قبل 2013 میں ہریانہ میں انتخابی ریلی اور 2014 میں سیاچن میں فوجیوں سے خطاب کرتے ہوئے ایک رینک ایک پینشن کی منظوری کا وعدہ کیا تھا۔ اس وعدے پر کئی ریٹائرڈ جرنیلوں اور ہزاروں ریٹائرڈ فوجیوں نے بی جے پی کو ووٹ ڈالا۔مطالبات پورے نہ ہونے پر جون 2015 میں ریٹائرڈ فوجیوں نے بھارت بھر میں مظاہرے شروع کیے۔2016 میں صوبیدار رام کشن نے مطالبات کی نامنظوری پر خودکشی کر لی تھی۔ مظاہروں کے دوران پولیس نے دہلی میں احتجاج کرنے والے ریٹائرڈ فوجیوں اور بیواؤں پر بہیمانہ تشدد کیا۔ مظاہرین پر تشدد کی وجہ سے 10 سابق آرمی چیفس نے مودی کو خط لکھ کر مذمت کی اور تحقیقاتی کمیشن کا مطالبہ کیا۔سپریم کورٹ کے واضح احکامات کے باوجود مودی سرکار نے زور زبردستی ترمیم کردہ بل منظورکر لیا۔مودی سرکار کے مطابق بل کی منظوری سے 40فیصد دفاعی بجٹ صرف پنشنز کی نذر ہو جائے گا۔ ریٹائرڈ فوجیوں نے بل کو مسترد کرتے ہوئے اسے ایک رینک پانچ کے مترادف پینشن قرار دیا تھا۔
بھارتی فوجی افسران اور جوان اپنی زندگیوں کا خاتمہ خود کرنے لگے ،2009 سے اب تک 9 برسوں میں ایک ہزار 22 بھارتی فوجیوں نے خودکشی کی۔ 2014 سے 2017کے درمیان 425جبکہ2009سے2013کے درمیان597 فوجیوں نے اپنے آپ کو مارڈالا۔گزشتہ چار برسوں میں آرمی میں نو افسران اور326جوانوں جبکہ فضائیہ میں پانچ افسران اور67ائیرمینوں نے خودکشی کی۔ اس عرصے میں بحریہ میں سب سے کم خودکشیاں دیکھنے میں آئیں جہاں دو افسران اور 16سیلرز نے اپنی زندگی کا خاتمہ کیا۔گزشتہ چار برس میں مسلح افواج میں خودکشی کے واقعات کے یہ اعداد و شمار بھارتی پارلیمنٹ کے سامنے رکھے گئے ۔بھارتی اخبار’ٹائمز آف انڈیا ‘ نے اپنی رپورٹ میں کہا کہ بھارت میں ہرسال 1600 فوجی جوان جنگ کا حصہ بنے بغیر ہلاک ہو جاتے ہیں۔
اعدادو شمار کی رو سے بہ لحاظ نفری وہ دنیا کی دوسری بڑی فوج ہے۔ سوا تیرہ لاکھ حاضر فوجیوں اور ساڑھے گیارہ لاکھ ریزرو فوجیوں پر مشتمل ہے۔ چھ ہزار کے قریب ٹینک اور تین ہزار سے زائد توپیں رکھتی ہے۔ غرض بھارتی فوج کاغذات میں یقیناً طاقت ور دکھائی دیتی ہے۔ مگر حقیقی زندگی میں وہ چھوٹے بڑے کئی مسائل سے دوچار ہے۔ یہی امر بھارتی ماہرین عسکریات کو ہر وقت تشویش میں مبتلا رکھتا ہے۔مثال کے طور پر انساس (INSAS) یعنی بھارتی ایسالٹ رائفلوں کا معاملہ ہی لیجیے۔یہ 1998ء سے بھارتی فوجیوں کا بنیادی ہلکا ہتھیار ہیں۔ جب پاکستانی فوجیوں کو ”نائٹ گوگلز” ملیں، تو بھارتی جرنیلوں کے کان کھڑے ہوگئے۔ وجہ یہ کہ انساس ایسالٹ رائفلوں کے بٹ کا رنگ نارنجی تھا۔ لہٰذا نائٹ گوگلز پہنے پاکستانی فوجی بھارتی فوجیوں کی رائفلوں کے بٹ دیکھ کر جان لیتے کہ وہ کہاں چھپے بیٹھے ہیں۔ چناں چہ بھارتی فوجی اپنی حکومت پر زور دینے لگے کہ انہیں رائفلوں کے بٹ کا رنگ بدلنے کی خاطر فنڈز جاری کیے جائیں۔ بھارتی افسر شاہی کی سست رفتاری و نااہلی کا اندازہ اس حقیقت سے لگائیے کہ یہ فنڈز جاری کرنے میں کئی سال لگ گئے۔ حال ہی میں فنڈز جاری ہوئے، تو رائفلوں پر خاکی رنگ پھیرا گیا۔ یہ واقعہ دیگ کے ایک دانے کے مصداق ہے۔ بھارتی حکومت اور بھارتی فوج کے مابین کشمکش اور کھینچا تانی کی تاریخ اتنی ضخیم ہے کہ اسے لکھتے ہوئے پور ی کتاب مرتب ہوجائے۔
بھارتی ماہرین کا کہنا ہے کہ آج بھارتی فوج بھاری اسلحے کی کمی’ افسر شاہی کے سرخ فیتے اور بنیادی سہولتوں کے نہ ہونے جیسے مسائل میں گرفتار ہے۔ نوبت یہاں تک پہنچ چکی کہ عام فوجی اپنی جیب سے خرچ کرتے ہیں تاکہ میدان جنگ میں اپنی جانیں بچا سکیں۔ مثلا ً کچھ عرصہ قبل مقبوضہ کشمیر میںایک فوجی دستے نے بازار سے ریتلے تھیلے خریدے تاکہ انہیں اپنے مورچوں کے سامنے رکھ سکیں۔ان فوجیوںکو رات کے وقت کشمیری مجاہدین کے حملے کاخطرہ تھا۔ اڑی میں بھی حملہ آوروں نے رات کوبریگیڈ کمانڈ سینٹر پر دھاوا بولا تھا۔ انہوں نے پھر آتش انگیز مادوں کے ذریعے فوجیوں کے خمیوں میں آگ لگا دی۔یہ صورت حال عیاں کرتی ہے کہ بھارتی فوج رقم کی کمی کا شکار ہے۔ حتیٰ کہ اس کے پاس اتنے فنڈز نہیں کہ اپنے فوجیوں کو ریتلے تھیلے خرید دے۔بھارتی فوج کے ریٹائرڈ لیفٹیننٹ جنرل’ بی ایس جسوال کا کہنا ہے ”رائفلوں سے لے کر توپوں تک’ اسلحے کی کمی کے باعث بھارتی فوج کا مورال بہت متاثر ہو چکا۔ حقیقت یہ ہے کہ جدید ہتھیاروں کے معاملے میں ہم اپنے حریفوں سے پندہ سال پیچھے ہیں۔”
اسلحے اور عام استعمال کی اشیا کے علاوہ بھارتی فوج نفری میں کمی سے بھی پریشان ہے۔ اعداد و شمار کی رو سے بھارتی فوج میں 9100افسروں اور 31 ہزار فوجیوںکی کمی ہے۔ اس کمی کے باعث بہت سے کام وقت پر مکمل نہیں ہو پاتے۔بھارتی فوج کی تربیت کے نظام پر بھی سوال اٹھائے جارہے ہیں۔ اس ضمن میں نارتھرن آرمی کا سابق کمانڈر’ لیفٹیننٹ جنرل(ر) ایچ ایس پاناگ کہتا ہے: ”بھارتی فوج میں 3500سنائپر شامل ہیں۔ مگر ان کا نشانہ بہت ناپختہ ہے۔ حد یہ کہ مٹھی بھر اسنائپر ہی 600میٹر دور سے سر اور 1000 میٹر دور سے جسم کا ٹھیک نشانہ لگا پاتے ہیں۔ میرے نزدیک اسلحے کی کمی اتنا بڑا مسئلہ نہیں، اہم مسئلہ یہ ہے کہ بھارتی فوجیوں کو مناسب تربیت نہیں مل رہی۔ یہ ناتجربہ کار فوجی میدان جنگ میں کیا کارکردگی دکھاپائیں گے؟”۔
٭٭٭

متعلقہ خبریں