فرشتوں سے بہتر ہے انسان بننا

شاید اب سوچنا محال، بات کرنا مشکل اور سمجھانا یقینا اس سے بھی مشکل مرحلہ ہے ، قحط الرجال ہے ،یا اخلاقی اقدار کے امین خال خال رہ گئے ہیں کیا زمانہ آگیاہے جو سچے ،کھرے اور بے غرض ہیں ان کی کوئی سننے کو تیارنہیں ،بات ماننے پر آمادہ نہیں لوگ لچھے دار باتیں کرنا اور سننا پسند کرتے ہیں بیشتر صاف ،ستھری کھری بات کرنے والوں سے ناراض، ناراض رہتے ہیں جیسے وہ کسی اور سیارے کی مخلوق ہوں ہر چیزپر مادیت اس قدر غالب ہے کہ لوگوں کا،چیزوں کا اور ماحول کا اصل حسن چھپ گیا ہے بات کرو تو سب تسلیم بھی کرتے ہیں ، کوئی مانے نہ مانے دل تو ضرور گواہی دیتاہے کسی لالچ ، اجریاثواب اور صلہ کی خواہش کیے بغیر انسانیت کی خدمت ہی زندگی کی علامت ہے ،کہنے والے یہی کہتے ہیںآدمیت سے انسانیت کے درمیان معمولی سا فرق ہے جس نے یہ راز جان لیا سمجھ لیجئے نسخہ ٔ کیمیا اس کے ہاتھ لگ گیااسی لیے حالی نے کہا تھا

فرشتوں سے بہتر ہے انسان بننا
مگراس میں لگتی ہے محنت زیادہ

لیکن کیا کیجئے ، آدمیت سے انسانیت کے درمیان معمولی سا فرق بھی اب ہمیں کوئی فرق نہیں لگتا ضمیر، احساس اور مروت کا گلہ گھونٹ کر شاید ہم نے تنزلی کو ہی ترقی کامتبادل سمجھ لیاہے اسی لیے تیزی سے تنزلی کا یہ سفر جاری ہے لیکن کسی کو مطلق احساس تک نہیں اسے اجتماعی بے حسی سے بھی تعبیر کیا جا سکتاہے اور اجتماعی خودکشی بھی۔حکومتی نمائندے، اہل ِ فکر،دانشور بالخصوص علماء کرام اساتذہ معاشرے میں بہتری کے لیے کچھ اسباب پر غور کریں لوگوںمیں حلال حرام کی تمیزاجاگرکی جائے،ہر سطح پر ظلم کے خلاف مو ٔثر تحریک چلا ئی جائے۔۔نفرتوںکے خاتمہ کے لیے محبت ،رواداری اورمذہبی ہم آہنگی کے فروغ کے لیے کچھ کیا جائے تو بہتوںکا بھلاہوگا۔ لیکن کریں کیاشاید اب سوچنا محال، بات کرنا مشکل اور سمجھانا یقینا اس سے بھی مشکل مرحلہ ہے ۔ ستم بالائے ستم یہ کہ دل محبت سے خالی ہو گئے ہیں انسانیت کے ناطے ہم سب کو مروت، احساس ،اخوت،بھائی چارہ اور ایک دوسرے کی چاہت معاشرے کا لازمی جزہونا چاہیے لیکن دیکھنے میں یہ آیا ہے کہ لوگ احساس سے عاری ہوتے جارہے ہیں اوردل ہیں کہ خواہشات کے قبرستان بن گئے کوئی سمجھنا ہی نہیں چاہتا کہ کسی لالچ ، اجریاثواب اور صلہ کی خواہش کیے بغیر انسانیت کی خدمت ہی زندگی کی علامت ہے ،جنوبی ایشیاء کے بیشترممالک میں غربت،دہشت گردی ،بے روزگاری،مہنگائی ،جسم فروشی اور چوری ،ڈکیتی،راہزنی دیگرمسائل کا بڑا سبب دولت کی غیرمنصفانہ تقسیم ہے جس نے مسائل در مسائل کو جنم دے کر عام آدمی کی زندگیاں تلخ بنادی ہیں ،یہ غریب ممالک جن چیلنجز سے نبرد آزما ہیں اس سے نکلنا محال ہے کیونکہ مہنگائی،بیروزگاری،غیرملکی قرضے اس کی راہ میں بڑی رکاوٹ ہیں ان کی بنیادی وجہ یہ ہے کہ ملکی وسائل چند خاندانوںتک محدودہوکر رہ گئے ہیں یہی لوگ اس وقت ترقی پذیرملکوںمیں عام آدمی کی تقدیرکے مالک بنے ہوئے ہیں اصلاح ِ احوال کے لیے کوئی طریقہ ہے نا سلیقہ۔لگتا ہے کسی کو اس بارے سوچنے کی کوئی فکرنہیں اچھے خاصے لوگ تنقید کے ڈر یا

بااثرلوگوںکے خوف سے تعمیری کام کرنا بھی بند کردیتے ہیں۔
کبھی کبھی ہم سوچتے رہتے ہیں اور سوچ ۔۔سوچ کر سوچتے ہیں کہ ہمارے معاشرے میں ظالم ا تنے طاقتور، بااثر اورصاحب ِ اختیار کیوںہیں کہ آئین اور قانون بھی ان کے سامنے بے بس رہتاہے ،اس لیے ہرروز ایک نیا سانحہ جنم لے رہاہے۔ہررات ظلم کی ان گنت کہانیاں جنم لیتی ہیں۔ہر سورج مظلوموںکے لیے نیا امتحان لے کر طلوع ہوتاہے کبھی مظلوم خودسوزی کرتے ہیں لیکن بااثر ملزمان کا کچھ نہیں بگڑتا ،الغرض سمجھ نہیں آتی ہر قسم کی سماجی قباحتوںاور عجیب رسم و رواجوں اور برائیوںمیں جکڑا یہ معاشرہ کب سدھرے گا؟ جنوبی ایشیاء ہو افریقی یا دوسرے غریب اور پسماندہ ممالک کے حکمران ہیں کہ روز نیا دعویٰ کرتے ہیں۔ اور ان کے حواری تعریف میں زمین و آسمان کے قلابے ملاتے ہوئے تھکتے نہیں اورمزے کی بات یہ ہے کہ انہیں کوئی شرم بھی محسوس نہیں ہوتی لیکن عوام کی حالت جوں کی توں ہے۔شاید اب سوچنا محال، بات کرنا مشکل اور سمجھانا یقینا اس سے بھی مشکل مرحلہ ہے کیا عام آدمی مایوس ہو جائے ؟ ۔نرمی ،تر غیبات، آسائشیں اور مراعات قانون شکنوں کے لیے نہیں صرف اور صرف ان کے ہونی چاہئیں ۔جو حکومت کی رٹ مانتے ہوں۔قانون کا احترام دل سے کریں۔اورسماج کی خدمت کا جذبہ رکھتے ہوں ہمارے خیال میں وہ وقت قریب آن پہنچاہے جب حکمرانوںنے یہ فیصلہ کرناہے کہ ا س دھرتی کے نظام درست کرناہے یا اشرافیہ کو یونہی شتر بے مہار آزادی دئیے رکھنی ہے ہم نے عام آدمی کی بھلائی کے لیے کام کرناہے یا پھر ڈنگ ٹپائو پالیسیاں بناکر اپنے آپ کے ساتھ منافقت کرنی ہے ،یہ سسٹم ایسے ہی چلتا رہا تو اخلاقی اقدار،
اخلاقیات اور یگانگت کا جنازہ روز سر بارار اٹھے گا اور ہمارے ارد گرد وحشت،بے شرمی اور بے حیائی ناچ رہی ہوگی اور ہم کچھ کرنا بھی چاہیں تو کچھ نہیں کر پائیں گے۔یاد رکھیں اگر قدرت ہمیں مہلت پہ مہلت دیئے جارہی ہے تو اس سے فائدہ اٹھایا چاہیے جناب!برا منانے کی کوئی ضرورت نہیں پاکستان میں میاںنوازشریف کی حکومت ہو یا آصف زرداری ،عمران خان برسرِ اقتدارہوں یا کوئی اور،طرز ِ حکومت پارلیمانی ہو یاصدارتی ،فوجی ڈکٹیٹر حکومت میں ہو یا جمہوری سیاستدان ،بھارت میں کانگرس کی حکومت ہویا بی جے پی کی ،جنتا پارٹی ہو یا کوئی قوم پرست پارٹی کی حکومت،بنگلہ دیش میں حسینہ واجد ہوںیا کوئی اور اس سے کوئی فرق نہیں پڑتا عوام کی حالت اور ملکوں کے حالات کبھی نہیں بدلے اب عام آدمی کاحکمرانوں سے فقط ایک سوال ہے ہماری حالت کب بدلے گی؟ کیا فیصلہ ہے کیا آپ نے ؟ عوام کو بھی ریلیف ملے گا یا نہیں سفارش ،رشوت کے بغیربھی غریبوںکو جینے کا حق ملے گا یا نہیں؟ ورنہ ہمارے جیسے تنقید کرنے والوں کے بارے میں لوگوںکی رائے مسلمہ ہے

اس جھوٹی نگری میں ہم نے یہی ہمیشہ دیکھا ہے
سچی بات بتانے والے کچھ کچھ پاگل ہوتے ہیں
۔۔۔۔۔۔۔۔۔۔۔۔۔۔۔۔۔۔۔۔۔

متعلقہ خبریں