عمل کے قلاش
( ماجرا۔۔ محمد طاہر)

یہ عہد الفاظ کے خراچوں اور عمل کے قلاشوں کا ہے۔عمران خان نے کوالالمپور کانفرنس کے حوالے سے جو فیصلے کیے، اس نے پاکستان کی جدید تاریخ کا سب سے شرمناک واقعہ تخلیق کیا۔طیب اردوان نے جب کہا کہ پاکستان سعودی عرب کی دھمکی کے باعث کوالالمپور کانفرنس سے دستبردار ہوا تو اس کے پیچھے تاریخی شعور کا ایک وفور بھی تھا۔کبھی روس کے زار نکولس اول نے سلطنت عثمانیہ کے لیے ’’مردِ بیمار‘‘ کی اصطلاح استعمال کی تھی،تاریخ کے بہاؤ میں ترکی ایک تہذیب کا وارث ہے، تہذیبوں میں زندگی کرنے والی ریاستیں اپنی بیماریوں سے نجات پالیتی ہیں۔ یورپ کا مردِ بیمار اب صحت یاب ہے۔ مگر پاکستان ، یہ وزیراعظم عمران خان کی مدینہ کی ریاست، الامان والحفیظ! الامان والحفیظ!!

معلوم نہیں، طیب اردوان کو عظیم الشان سلیمان عالی شان کے وہ الفاظ یاد رہے ہوں گے، جو اُنہوں نے فرانسس اول کے قاصد ژان دے لافورے کو کہے تھے، جب فرانسس سلطنت عثمانیہ کو اپنے مقاصد کے تحت چار لس کے خلاف جنوبی اٹلی پر حملے میں ملوث کرنا چاہتا تھا۔ اتنا ہی نہیں وہ سلطنت سے مالی امداد کا بھی خواہش مند تھا، اس کے عوض اُس نے مختلف ترغیبات دیں اور وعدے کیے۔جسے صرف شک کی نظر سے ہی دیکھا جا سکتا تھا۔ تب ، تب سلیمان عالی شان نے دے لافورے سے کہا

میں اُس پر کیسے اعتبار کروں؟ وہ جو کر نہیں پاتا اس سے زیادہ کا وعدہ کرتا ہے‘‘۔

عمران خان ، ہائے عمران خان کے وعدے! طیب اردوان نے پاکستان سے تعلق کی وضع داری کو دھیان میں رکھا جو ملائیشیا کانفرنس سے دستبرداری کو سعودی عرب کی دھمکی کا نتیجہ قرار دیتے ہوئے زیادہ بوجھ وہاں منتقل کردیا مگر تب اُن کے ذہن میں سلیمان عالی شان کے لافورے کو کہے ہوئے الفاظ کے ساتھ عمران خان کے وعدے اور اقوام متحدہ کی سلامتی کونسل کے اجلاس میں تقریر کے الفاظ ضرور گونجے ہوں گے۔ یقین نہیں آتا کہ کوئی شخص اپنے الفاظ کو بے توقیر کرکے خود اپنے ہی خلاف سینہ تان کر اس طرح کھڑا ہوسکتا ہے۔عمران خان اپنی پوری حزب اختلاف کی سیاست میں جن دو رہنماؤں کی باربار تحسین کرتے رہے وہ ترکی کے صدر اور ملائیشیا کے یہی وزیراعظم تھے۔ اقوام متحدہ میں اپنے خطاب کے بعد وہ ان دونوں رہنماؤں کے ساتھ امتِ مسلمہ کا موقف دنیا تک پہنچانے کے لیے ایک ٹیلی ویژن لانے کی منصوبہ بندی کرتے رہے۔ باقی دونوں رہنماؤں نے اپنے اس منصوبے کے حوالے سے خاموشی اختیار کیے رکھی۔ مگر عمران خان نے ڈھم ڈھم بجتی ڈھول کی طرح اس منصوبے کو پیٹنا شروع کردیا۔ ایک سطحی آدمی کی طرح جو اپنے قد سے بلند خیال کے سحر میں خود بھی گرفتار ہوجاتا ہے۔ عمران خان نے یہی سمجھا کہ وہ امت مسلمہ کے مسلمہ لیڈر بن کر اُبھررہے ہیں۔ مگر وہ پہلے ہی قدم پر ٹھوکر کھا کر گرے۔

پاکستانی سیاست میں تضادات کی تخلیق اور یوٹرن لے کر بعض طاقت ور حلقوں کی چھتر سایہ میں اپنے خلاف آوازوں کی شدت کو کم کیا جاسکتا ہے، مگر عالمی سطح پر یہی انداز برتنا نادانی سے بڑھ کر ہے۔ عمران خان انتہائی سطحی ذہن کے ساتھ بڑی بڑی باتیں کرنے کے عادی ہو چکے ۔ وہ عرب وعجم مسلم دنیا کے تاریخی تنازعات سے لاعلم ہیں۔ وہ خود عرب دنیا کے قبائلی مزاج سے بھی آگاہ نہیں یہاں تک کہ وہ جس ولی عہد کی پاکستان میں ڈرائیونگ کرتے رہے، اُن کے بھی مزاج آشنا نہیں۔ سعودی ولی عہد محمد بن سلمان اپنے ملک میں کیا ’’تبدیلیاں‘‘ لارہے ہیں اور اس کے اثرات سے بچنے کے لیے وہ اپنا عالمی مقام کیسارکھنا چاہتے ہیں ، اس کی نزاکتیں اُنہیں کس قسم کے اقدامات اُٹھا نے پر مجبور کررہی ہیں؟ اس کا ایک مطالعہ ہماری خارجہ حکمت عملی کے لیے یوں بھی ضروری ہے۔ وزیراعظم عمران خان پاکستان کی حقیقی مجبوریوں کا ادراک بھی کرنے سے قاصر رہے جو ایک ’’بھکاری‘‘ کی نفسیات سے بروئے کار آتے ہوئے اُسے سعودی عرب کے آگے لاچار رکھتا ہے۔ پھر امریکا کی تحویل میں خود کو رکھنے اور دیکھنے کی غلامی جیسی عادت نے ہمیں کیا سے کیا بنادیا ہے ۔چنانچہ امریکا اپنے بعض معاملات کو سعودی عرب کے ذریعے پاکستان میں جس طرح منظم کرتا ہے، اُس کی تاریخ بھی بھیانک طور پر ہمیں حاشیے میں ڈالے رکھتی ہے۔ اگرچہ ہم عالم اسلام کے ایک ممتاز ملک کے طور پر خود کو ایک زعم باطل میں بھی مبتلا رکھے ہوئے ہیں۔ یہ امر ہمیشہ سے ناقابل فہم رہا کہ ہمارے اتنے غلط تصورات کی تشکیل کا منبع کیا ہے؟

سعودی عرب سے پاکستان معاشی مسائل کے حل میں ہمیشہ مدد کا طالب رہتا ہے۔پھر ایسا کیونکر ہوسکتا ہے کہ دینے والا لینے والے کی پرواکرے۔ گزشتہ چند ماہ کے تجربات کافی تھے کہ عمران خان معاملات کا فہم حاصل کرتے۔وہ اقوام متحدہ میں جس مصنوعی آن بان کا مظاہرہ کر آئے تھے، وہاں وہ سعودی ولی عہد کے ذاتی جہاز میں گئے تھے۔ نیویارک میں اُن کی سرگرمیوں پر سعودی ناپسندیدگی کا اظہار اُن کی طیارے سے واپسی کے دوران اچانک ’’خرابی‘‘ سے ظاہر ہوا ۔ چنانچہ فضا سے جہاز کو واپس موڑ کر اُنہیں ہتک آمیز انداز میں ایک عام جہاز سے واپس ہانکا گیا تھا۔ اس رسوائی کا ٹھیک اندازا لگایا گیا نہ چرچا کیا گیا۔ وزیراعظم عمران خان نے 5اگست کے بعد کے کشمیر پر مسلم ممالک کے کردار سے مایوسی ظاہر کی، یہاں تک کہ ایک موقع پر کہا کہ وہ بھارت سے وابستہ معاشی مفادات کو اہمیت دے رہے ہیں۔یہ اشارہ سعودی عرب کی بھی جانب تھا۔ سعودی عرب اور متحدہ عرب امارات نے اپنے اپنے ممالک میں بھارتی وزیراعظم کا غیر معمولی استقبال کیا۔یہ ممالک دوائے دل تو ہمیں بیچتے رہے، مگر اربوں ڈالر کی سرمایہ کاری سے دکانِ تجارت بھارت میں بڑھاتے گئے۔ ثابت کیا کہ مسلم امہ کا تصور تجارتی مفادات کے سامنے کوئی اہمیت نہیں رکھتا۔ اس سے بڑھ کر معاملہ یہاں تک پہنچا کہ سعودی وامارتی وفد نے پاکستان آکر یہ باور کرایا کہ کشمیر مسئلے کو مسلم امہ کا مسئلہ باور نہ کرایا جائے۔ پاکستان کے لیے کشمیر زندگی موت کا مسئلہ ہے، وطن عزیز نے اپنے قیام کے بعد سے آج تک دنیا سے جتنے روابط رکھے ، اس کا تناظر یہی رہا۔ داخلی طور پر دفاعی اہداف کا پس منظر بھی کشمیر رہا۔ بدقسمتی سے جب امتحان ہوا تو پاکستان کے علاقائی و عالمی مراسم اس معاملے میں ٹھس نکلے۔ پاکستان بے بسی کی تصویر بنارہا۔ سعودی عرب اور متحدہ عرب امارات نے اس پر نہ صرف چپ سادھے رکھی بلکہ اپنا وزن بھارت کے پلڑے میں بالواسطہ رکھا۔ اس حوالے سے یہ تاثر تقویت پکڑتا رہا کہ دونوں ممالک اس ضمن میں امریکی نقشے کے تحت بروئے کار ہیں اور بھارت کو مقبوضہ کشمیر عملاً دے دیا گیا ہے، اس کے بعد جو کچھ ہورہا ہے وہ پالیسی نہیں ،پالیسی کی ایک اداکاری ہے۔

یہ تاثر بے وزن نہیں کیونکہ پاکستان نے کشمیر کے حوالے سے پاکستان کی حمایت اور بھارت کی مذمت کرنے والے مسلم ممالک کے بجائے اُن ممالک کو اہمیت دی جو مسئلہ کشمیر پرنفاق کا مظاہرہ کرتے رہے اور بھارت کے ساتھ اپنے معاشی مفادات وابستہ رکھے۔ درحقیقت اس پہلو سے پاکستان بھی ان ہی ممالک جیسا ثابت ہوا۔ جس نے اپنے معاشی مفادات کو مسئلہ کشمیر سے زیادہ اہمیت دی۔ اب دیکھیے! کشمیر پر مسلم ممالک میں ترکی اور ملائیشیا ہی پاکستان کے ساتھ کھڑے رہے۔ یہاں تک کہ ایف اے ٹی ایف پر بھی ان ہی دو ممالک نے پاکستان کی خم ٹھونک کر حمایت کی۔ لیکن پاکستان نے بھارت کو ترجیح دینے والے ممالک سعودی عرب اور متحدہ عرب امارات کی جانب خود کو جھکائے رکھا۔یہاں تک کہ کوالالمپور کانفرنس میں خود کو شرکت سے روک کر اپنی رسوائی کا سامان بھی کیا۔یہ رسوائی ہمہ گیر ہے۔ کیونکہ ترکی کے صدر طیب اردوان نے اس عدم شرکت کو سعودی عرب کا دباؤ قرار دے کر بھانڈا بھی پھوڑ دیا۔ بدقسمتی سے پاکستان نے اس کانفرنس میں شرکت نہ کرکے جو عذر پیش کیا وہ ترکی کے صدر کی زبان سے جاری ہوا۔ جس کی سعودی عرب کو تردید کرنا پڑی۔ اب پاکستان ایک طرف سعودی عرب اور دوسری طرف اپنے حامی ممالک ترکی اور ملائیشیا دونوں کے نزدیک قابل اعتبار نہیں رہا۔ اس ہمہ گیر رسوائی کا محرک کوئی اور نہیں صرف اور صرف نااہلی ہے۔ پاکستان میں جیسی سیاست اندرون ملک جاری ہے، ویسا رویہ ممالک کے درمیان روابط میں روا نہیں رکھا جاسکتا۔ ہمارے لیے سب سے بڑا سوال یہ نہیں کہ ہمار ے حامی کون سے ممالک ہیں بلکہ اصل سوال یہ ہے کہ ہم خود اپنے کتنے حامی ہیں؟الفاظ کے خراچ اور عمل کے قلاش تہی دامن ہی رہیں گے، اس کا جواب صرف کردار سے ملے گاجووزیراعظم عمران خان کے پاس بالکل نہیں۔بدقسمتی تو یہ ہے کہ طاقت ورحلقے اس تہی دامنی پر خوش بھی ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔

متعلقہ خبریں