... loading ...
... loading ...
سعودی وزارت حج و عمرہ نے بتایا ہے کہ امسال محرم میں عمرہ سیزن کے آغاز سے اب تک 6 لاکھ 88 ہزار 184 ویزے جاری کیے جاچکے ہیں ۔ سب سے زیادہ عمرہ ویزے پاکستان کیلئے جاری کیے گئے جن کی تعداد ایک لاکھ 70 ہزار 824 ہے ، دوسرے نمبر پر بھارت کیلئے 95 ہزار 749 عمرہ ویزے جاری کیے گئے ۔ اب تک سب سے کم عمرہ ویزے ترکی کے لیے جار ی ہوئے جن کی تعداد 4 ہزار 652 رہی۔
مختلف ممالک کے لیے جاری عمرہ ویزوں پر اب تک مملکت آنے والے معتمرین کی تعداد 4 لاکھ 11 ہزار 654 رہی ۔ایک لاکھ 56ہزار 529 معتمرین مملکت سے واپس جاچکے ہیں ۔ وزارت حج و عمرہ کی جانب سے جاری اعداد وشمار میں کہا گیا ہے کہ اس وقت مملکت میں 2 لاکھ55 ہزار 125 معتمرین موجود ہیں جن میں سے ایک لاکھ 79 ہزار 643 مکہ مکرمہ اور 75 ہزار 482 مدینہ منورہ میں مقیم ہیں ۔ سب سے زیادہ فضائی راستے سے معتمرین مملکت پہنچے جن کی تعداد 3 لاکھ 86 ہزار 750 رہی جبکہ بری راستوں سے 24 ہزار 880 اور سمندری ذریعے سے 24 معتمرین مملکت پہنچے۔
انڈونیشا سے آنے والے معتمرین کی تعداد اب تک 59 ہزار 307 ، ملیشیاء سے 9558 ، برطانیہ سے 9319، متحدہ عرب امارات سے 8935 ، اردن سے 8278 اور بنگلہ دیش سے 5857 معتمرین مملکت آئے ۔ وزارت حج و عمرہ کا کہنا تھا کہ معتمرین کی آمد کا سلسلہ جاری ہے۔ وزارت کی جانب سے معتمرین کی سہولت کے لیے بہترین انتظامات کیے گئے ہیں ۔ کسی بھی شکایت کی صورت میں حرمین میں قائم کیے گئے وزارت حج وعمرہ کے ذیلی دفاتر سے رابطہ کیاجاسکتا ہے جہاں معتمرین کی خدمت کے لیے مختلف زبانوں کے بولنے والے ماہرین موجود ہوتے ہیں ۔
