... loading ...
... loading ...
الحمد للہ پاکستانی قوم آزادی کے 70ویں سال میں داخل ہو گئی ہے۔آزادی بڑی نعمت ہے اس پر جتنی بھی خوشی منائی جائے وہ کم ہے۔پاکستان میں عورت، مرد،بچے، بوڑھے، جوان سب اپنی اپنی خواہشات اور سوچ کے مطابق آزادی کا جشن منا رہے ہیں ۔ہر طرف پاکستان کے ہلالی پرچموں کی بھرمار اور بہار ہے ۔ملک کے اندر اور ملک کے باہر خوشی کا سماں ہے۔ بچے اپنے چہروں پر پاکستان کا پرچم بنا رہے ہیں ۔ جوان اپنے گھروں پر پرچم لگا رہے ہیں ۔ گاڑیوں والے اپنے گاڑیوں پر پرچم لگا ئے ہوئے ہیں ۔ پرنٹ اور الیکٹرونک میڈیا پاکستانی عوام کے دلوں میں آزادی کی اہمیت کو اُجاگر کر رہے ہیں ۔ غرض عوام اور حکومت ہر کوئی اپنی اپنی بساط کے مطابق جشن آزادی منا رہاہے۔ ہم بھی ایک صحافی ہونے کے ناتے برسوں سے آزادی کے موقع پر ایک آدھ کالم لکھ کر آزادی کی مہم میں شامل ہوتے رہے ہیں ۔ لیکن اس دفعہ جی ٹی روڈ کامرہ کمپلیکس کے سامنے ایک گاؤں میں رہنے والے پاکستان کے ہمدرد، ایک اسلامی ، فلاحی، قائد کے وژن کے مطابق خوشحال پاکستان اور آزادی کے متوالے دوست نے ہمیں اس بات آمادہ کیا کہ ایک آدھ کالم سے آزادی کا حق ادا نہیں ہو سکتا ۔ آپ کو تحریک آزادیِ پاکستان کی جد وجہد کے سارے پہلوؤں کو اُجاگر کر کے پاکستانیوں کے سامنے رکھنا چاہیے۔ چنانچہ اس دفعہ ہم نے آزادی پاکستان پر یکم اگست سے آج آخری کالم تک اپنے سات کالموں میں تحریک ِ آزادی پاکستان کی جد وجہد کو اپنی بساط کے مطابق بیان کرنے کی کوشش کی ہے ۔ہم نے اپنی تحریروں میں بیان کیا ہے کہ جب برصغیر کے مسلمان حکمرانوں کی نا اہلیوں ، بقول شاعر اسلام علامہ شیخ محمد اقبال ؒ’’ میں تجھ کو بتاتا ہوں تقدیر امم کیا ہے۔۔۔ شمشیر و سناں اوّل طاؤس و رباب آخر۔ کی وجہ سے برصغیر ،جس پر انہوں نے محمد بن قاسم ثقفی سے لے کر مغل حکمران بہادر شاہ ظفر تک ایک ہزار سالہ حکومت صلیبیوں نے چھینی تو حکمرانی کے مروجہ قاعدے کے مطابق مغلوب قوم یعنی مسلمانوں کی سوچ کو پستی کی ان گہرائیوں تک پہنچا دیا کہ ان کے ذہن ایک قوم کے تصور سے خالی ہو گئے۔ اس میں صلیبیوں کے ساتھ ساتھ ہندو بھی شامل تھے۔
شاعر اسلام علامہ شیخ محمد اقبالؒ نے مسلمان قوم کو اپنی شاعری کے ذریعے قرآن اورسنت کی روشنی میں پھر سے زندہ کیا اور اقبالؒ کی ہی مشورے سے ہی ایک عظیم شخصیت حضرت قائد اعظم محمد علی جناحؒ نے برصغیر میں بکھری ہوئی مسلمان قوم کو قرآن اور سنت کی بنیاد پر جمہوری، سیاسی ،دو قومی نظریہ کے مطابق دلائل سے پہلے اکٹھا کیا۔ پھر ان کو اپنے حقیقی حقوق کا سبق یاد کرایا۔ پھر نعرہ مستانہ ’’ پاکستان کا مطلب کیا، لا الہ الا اللہ‘‘ لگا کر اسلام کی قوت و اتحاد کا مظاہرہ کیا اور برصغیر سے اپنے اقتدارکے سورج کوغروب ہوتے دیکھنے والے ا نگریزوں اور اپنی عددی قوت پر ناز کرنے والے ہندوؤں کی سازشوں کو اعلانیہ شکست دے کر دنیا میں آبادی کے لحاظ سے چھٹی اور اسلامی دنیا میں پہلی مملکت اسلامی جمہوریہ پاکستان مثل ِمدینہ ریاست حاصل کی۔ ہم نے اپنے گزشتہ کالموں میں اس راہ میں پیش آنے والی مشکلات کا بھی ذکر کیا کہ قاعد اعظم ؒ کس طرح دو دفعہ ٹکڑوں میں تقسیم ہونے والی آل انڈیا مسلم لیگ کی پالیسیوں سے بیزار ہو کر لندن چلے گئے۔ پھر علامہ اقبال ؒ کی درخواست پر واپس آکر مسلم لیگ کی صدارت پرفائز ہو کر اس کو ایک پلیٹ فارم پر جمع کر ا کے اس ذریعے مسلمانوں کی قوت کا مظاہرہ کیا۔ کس طرح قائد اعظم ؒ نے قراداد مقاصد (جو بعد میں قرراداد پاکستان کہلائی )کو 23 مارچ1940ء کو منٹو پارک لاہور میں مسلمانوں کے لاکھوں کے اجتماع میں منظور کرایا۔ کہ جسے قائد اعظمؒ کے رفیق کار، لیاقت علی خان نے پاکستان کے آئین میں اساسی طور پر شامل کیا۔آل انڈیا مسلم لیگ کے پلیٹ فارم پرخواتینِ اسلام نے جد وجہد آزدی میں حصہ لیا۔ برصغیر کے مسلمان کہ جن کے صوبوں میں پاکستان نہیں بننا تھا پاکستان کی جد وجہد میں صرف اور صرف اسلام کے بابرکت نام پر تحریک آزادیِ پاکستان میں حصہ لیا اور آج تک بھارت میں ہندوؤں کی مظالم برداست کر رہے ہیں ۔
لیاقت علی خان کے بعد کس طرح پاکستان کے حکمرانوں نے قائد اعظمؒ کے پاکستان میں اسلامی نظام کو نافذ کرنے کے وژن سے دھوکا کیا اور سیکولرازم کو پاکستان میں پروان چڑھایا۔پاکستان کے حکمران جو اپنے مسلمان ہونے پر فخر کرکے مفکر پاکستان علامہ اقبال ؒاور بانی پاکستان قاعد اعظم ؒ کی طرح قرآن و سنت سے رہنمائی حاصل کرنے کے لیے ،امریکا اور مغربی ملکوں کی طرف دیکھتے ہیں ۔ پاکستان جس کو اللہ تعالی نے چار موسموں سے نوازاہے۔ جس میں ایک وقت میں صحرا میں ریت تپ رہی ہوتی ہے تو اسی وقت اس میں موجود دنیا کی دوسری اور تیسری کی بلند و بالا پہاڑی چوٹیوں پر برف باری ہو رہی ہوتی ہے۔ اس میں پورے سال گرم پانیوں کے سمندر ہیں ۔ معدنیات سے مالا مال ملک ہے۔ مگر اس سے فائدہ اُٹھانے کے بجائے آئی ایم ایف اور دوسرے اداروں سے قرضے لے لے کر ملک کے ہر فرد کو ایک لاکھ بیس ہزار کا مقروض بنا دیا ہے۔ اس کے وزیر اعظم کو امین و صادق نہ ہونے کی بناپر ملک کی اعلی عدالت نے نا اہل قرار دے دیا اور ان کے خاندان پر کرپشن کے مقدمے قائم کرنے کا حکم جاری کیا ہے۔
صاحبو! اگر ایمانداری سے دیکھا جائے تو اس ملک کے سیاست دان70 سال سے ایک لاکھ الیکشن میں لگاؤ، کروڑوں کماؤ کے کاروبار میں لگے ہوئے ہیں ۔ کسی کو بھی قائد اعظم ؒ کے اسلامی پاکستان کی فکر نہیں ۔ بس پیسے بنانے کی فکر ہے۔ اس ملک کے عوام محنت کش ہیں ۔ پوری دنیا میں روزی کمانے کے لیے جاتے ہیں اور زر مبادلہ پاکستان کو کما کر دے رہے ہیں ۔ اللہ نے پاکستان کو سب کچھ دیا ہے۔ مگر نا اہل سیاست دانوں نے ملک کو ترقی دینے کے بجائے اس کے خزانے کو لوٹا۔ ہم70 سال سے حقیقی آزادی سے بہت دور ہیں ۔ اس کا ایک ہی حل ہے کہ مفکر پاکستان اور بانی پاکستان کے وژن کے مطابق پاکستان میں اسلامی نظام حکومت قائم کر دیا جائے۔ پھر اللہ اپنے دعدے کے مطابق آسمان سے رزق نازل کرے گا۔ زمین سے خزانے نکلیں گے۔ پاکستان میں خوش حال ہو گی اسی وقت ہم حقیقی آزادی کا جشن منانے کے قابل ہوں گے۔
