شرمناک شرمناکیاں

بے شرمی کی کوئی حد ہوتی ہے؟ شاید نہیں ہوتی، ہوسکتا ہے کہ دنیا کے کسی کونے میں ہوتی ہو؟ لیکن ہماری سیاست میں تو اب بالکل بھی نہیں ہوتی، اور اب تو بے شرمی کی حدود حماقت کی حدوں سے بھی آگے نکل گئی ہیں۔ سیاسی قیادت خواہ مارشل لائی گملوں میں پنیریوں کی طرح اگائی گئی ہو یا پھر کسی ’پاشائی‘ حادثے اور ضد کی پیداوار ہو ،ہٹ دھرمی کی صفت پر ڈٹے ہوئے ہیں، لیکن ظاہر ہے اقتدار کی غلام گردشوں کے پچھلے دروازوں سے اقتدار میں گھسنے کے خواہش مند وہی کچھ واپس لوٹا رہے ہیں جو کچھ ان کو اس معاشرے نے تربیت کے طور پردیا تھا۔ موقع پرستی، ہر قدم پر سمجھوتا، زبردست کے سامنے سجدہ ریزی اوکمزور کا استیصال ۔
اپنی سیاسی بقاء کے لیے اپنے ہی اداروں کے خلاف برسرپیکار۔ لیکن وہ بھی کیا کریں، ان اداروں نے بھی تواس ملک کی عمر کے آدھے حصے براہِ راست حکمرانی کی اور جب سیاستدانوں کو باری دی بھی تو اپنا ٹھینگا ان کے سر پر رکھا اور ساتھ میں غداری کے سرٹیفیکیٹ چھاپنے والی مشین بھی اپنے پاس ہی رکھی۔ اب نتیجہ سامنے ہے کہ جیسے ہی ہمارے دشمن سرحدوں کے باہر سے دباؤڈالتے ہیں تو ایک سیاسی گروہ فوراً دوسرے پر حملہ آور ہوجاتا ہے کہ اس کا مخالف دشمن کے ساتھ ملا ہوا ہے، کسی دور میں ایسے واقعات قوم کو متحد کرنے کا باعث ہوا کرتے تھے لیکن اب چلن بدل گیا ہے۔ جیسے جیسے سرحدوں سے عوام الناس اور سرحدی محافظوں کی شہادت کی خبروں کا تواتر بڑھتا جا رہا ہے ویسے ویسے ایک دوسرے پر الزامات کا سیلاب بڑھتا جا رہا ہے۔
یادش بخیر ! ہماری ملکی تاریخ یہی بتاتی ہے کہ ہمارے ان قومی اداروں نے محاذ جنگ پر اپنی ہر شکست کا انتقام اس پسماندہ اور غریب قوم کو ہی فتح کر کے لیا اور اپنا اگلے دس سال تک قوم پر مسلط ہو کرنکالا۔ بالکل ویسے ہی جیسے فٹ بال کے ایک کھلاڑی کے اپنے ہی گول میں گیند ڈالنے پر سائیڈ لائن پر کھڑے کوچ نے ڈانٹا تو وہ بولا کہ مخالف ٹیم والے گول کرنے نہیں دیتے۔ اسلامی تاریخ کی سب سے بڑی شکست کے مجرم جنرل آغا یحییٰ خان کو قومی پرچم میں لپیٹ کر دفن کیا اور دس سال تک آئین کا مذاق اڑانے والے بہادر کمانڈو جنرل پرویز مشرف کو پورے گارڈ آف آنر کی سلامی کے بعد ملک سے رخصت کیا۔ یہاں تک بس نہیں، جب وہ اپنی خود اختیار کردہ حماقت کے باعث پھنس گیا تو تمام ریاستی اداروں اور عدلیہ کا منہ چڑاتے ہوئے ڈنکے کی چوٹ پر اس کو ایک مرتبہ پھر ملک کے باہر بھجوایا، جس کا ڈنکا وہ ملکوں ملکوں بجاتا پھرتا ہے کہ اسے کس نے پاکستان سے باہر نکلنے میں مدد دی تھی۔
ادارے کے سربراہ کو جب مارشل لاء لگانے کا موقع نظر نہ آیا تو ’ملک کو باہرسے نہیں اندر سے خطرہ ہے‘کا نعرہ مستانہ لگا کر پورے ملک پر یلغار کردی۔ اور نتیجہ یہ ہے کہ ہر گلی محلے میں رونق لگ گئی۔ بقول حبیب جالب
اس ملک وچ موجاں ای موجاں
جدھر ویکھو فوجاں ای فوجاں
اور آج کل زور صرف ایک بات پر ہے کہ پنجاب میں رینجرز یا ایف سی کی آمد کو کیسے ممکن بنایا جا سکے؟
یہ باہمی سر پھٹول سے ہماری کمزوری کا پوری دنیا میں ڈھنڈورا ہورہا ہے، جس کے نتیجے میں ایک شکست خوردگی ہے جو بحیثیت قوم ہم پر مسلط ہے۔ اس شکست خوردگی کا ایک پہلو یہ بھی ہے کہ اب ازلی دشمن بھارت کے خلاف کسی بھی سطح پر مزاحمت نہیں ہو پاتی اور قومی مفادات کو طاقِ نسیاں میں رکھ دیا گیا۔
اور پھر یہ ہوا کہ اندرونِ ملک تو قوم کو مکے دکھائے گئے لیکن بھارت کی طرف سے اقوام متحدہ کی قرادادوں کی روح کے خلاف، خطِ متارکۂ جنگ پر خاردار تار لگانے پر بھی کوئی مزاحمت نہیں کی گئی تا کہ بہادر کمانڈو جنرل پرویز مشرف کے اقتدار کے سُروں میں کوئی خلل نہ پڑے۔ نتیجہ یہ نکلا ہے کہ پاکستان کی طرف دیکھتے ہوئے کشمیری بھی مایوس ہو کر لاتعلق ہو کر بیٹھ رہے ۔ لیکن جب سیاسی حکومت کے آنے پر کشمیریوں کی جدوجہد آزادی میں دوبارہ ایک نئی روح پھونکی جاتی ہے تو صدا کی ڈسی ہوئی (بوزنا ) سیاسی قیادت اسے اپنے خلاف ایک سازش سمجھ کر اچھل کود شروع کر دیتی ہے۔ ظاہر ہے دودھ کا جلا چھاچھ بھی پھونک پھونک کر پیتا ہے، اور راستے میں پڑی ہوئی رسی کو بھی سانپ ہی سمجھ لیتا ہے۔ کہا یہ جاتا ہے کہ مارشل لاء کے دور میں بھارت میں کوئی مجاہدانہ کارروائی نہیں ہوتی لیکن جیسے ہی سیاسی حکومت برسرِ اقتدار آتی ہے تو جہاد ی کارروائیوں کا آغاز ہو جاتا ہے؟ آپ اسے سیاسی قیادت کی کم عقلی، کوڑھ مغزی کہہ کر اس کے سر پر جوتے برسائیے اور گاہے گنتی بھی بھولتے رہیے لیکن یہاں پر تو عقل وشرم سے عاری سیاسی قیادت ہے، وہ سیدھے سبھاو ایک دوسرے کو مودی کا ساتھی، ایجنٹ اور سکیورٹی رسک قرار دے ڈالتی ہے اور اتنے بڑے الزام پر نہ آسمان ٹوٹتا ہے نہ زمین پھٹتی ہے۔
نتیجہ یہ نکلا ہے کہ الزاموں کی اس مقامی تجارت میں مودی کا کام آسان ہو گیاہے۔ پہلے زمانوں میں جب بھارت ہم سے سرحدی چھیڑ چھاڑ کرتا تو پوری قوم یکجان ہو جایا کرتی اور ساری زبانی توپوں کا رُخ بھارت کی طرف ہو جایا کرتا تھا ، لیکن اب ذہنی شکست خوردگی کا شکار، بھارتی فلموں کی لوری سن کر جوان ہوئی ایک پوری نسل، اس طرح کے مواقع پر بھارت کو کوسنے کی بجائے ایک دوسرے پر بڑھ چڑھ کر الزام تراشی شروع کر دیتی ہے کہ یہ سب کچھ تمہاری وجہ سے ہو رہا ہے۔ کیوں کہ تمہارے بھارت میں کاروبار ہیں اس لیے تم کچھ نہیں کرتے۔ یہ وہ کہلوا رہے ہوتے ہیں جنہوں نے خود کچھ کرنا ہوتا ہے لیکن نہیں کرتے یا کر پاتے۔ اور ٹی وی بیٹھ کر بڑے فخر سے کہتے ہیں کہ ’سرجیکل سٹرائیک‘ تو وہ تھی جو امریکا نے ایبٹ آباد میں کی تھی، یہ جو بھارت نے کی ہے وہ سرجیکل اسٹرائیک نہیں تھی۔ یعنی فرق صرف اتنا ہے کہ جو حق ہم نے امریکا کو دے رکھا ہے وہ بھارت کو دینے کا سوال ہی پیدا نہیں ہوتا۔ امریکا کو کیوں اور بھارت کو کیوں نہیں؟ ظاہر ہے امریکی ڈالر دیتے تھے، ارے بھیا تو وہ ڈالر تو اب ملنا بند بھی ہو گئے ہیں، اب تو صرف اس بات پر کام کیا جا رہا ہے کہ اگر ہم نے ان کا کام نہ کیا تو ہم سے اچھا بچہ ہونے کا سرٹیفکیٹ واپس ہو جائے گا ۔ بس صرف اتنی سی قیمت کے عوض ہم نے اپنے گھرکے صحن کو میدانِ جنگ بنا رکھا ہے اور روزانہ اپنے بچوں کے لاشے اٹھاتے ہیں اور دن رات کہتے ہیں کہ ’’دہشت گردی کے خلاف جنگ ہماری جنگ ہے‘‘۔
لیکن جن کو بھارت کے ان حملوں کا جواب دینا ہے وہ ٹویٹر پر بیانات جاری کر کے ’’دشمن کی توپیں چپ کراتے رہتے ہیں‘‘ اور ’’دشمن کی کمر توڑ دیتے ہیں ‘‘ لیکن وہ کیا ہے دشمن ٹوٹی کمر کے ساتھ اگلے دن پھر اپنی توپوں سے بارود اگلنا شروع کر دیتا ہے جو پھر ہمارے لوگوں کی زندگیوں کو چاٹ جاتی ہے۔ ہمارے مقتدر اداروں کو سال 1965اور 1971 کی جنگوں میں ہارے گئے علاقوں کو واپس لینے کا خیال کسی مارشل لائی دور میں نہیں آتا لیکن جیسے ہی سیاسی حکومت ہو تو پھر کارگل ہوجاتا ہے؟ یہ خیال اور اس کی منصوبہ بندی ہمیشہ جمہوری دور میں ہی کیوں یاد آتی ہے؟ یہ کہہ کر سیاسی قیادت ان مقامی عناصر سے الجھ پڑتی ہے اور جب سیاسی قیادت میں خواجہ آصف جیسے نابغے موجود ہوں تو دشمن کو کچھ کرنے کیا ضرورت ہے۔ بے شرمی کی کوئی حد نہیں ہوتی ، بے حیائی کا کوئی مقام نہیں ہوتا، گریس کی کوئی سطح نہیں ہوتی۔