غزہ کی تباہی: مظالم، انصاف اور بحالی کے چیلنجز

سمیع اللہ ملک
فلسطینی نژاد ڈاکٹرخالدکے مسلسل اصرارکے بعدجب اس کے گھرپہنچاتوعجیب ایک روحانی اوررومانوی مناظرنے مجھے مسحورکردیا۔یوں محسوس ہواکہ کمرے کی تمام دیواروں پرشہدا کے متعلق قرآنی کیلیگرافی کی شاہکارتصاویرمیرامحاسبہ کررہی ہیں۔خالدعرصہ درازسے لندن میں مقیم ہے۔10سال کے بعدپہلی مرتبہ اس کی اہلیہ اورتین بچے جونہی غزہ پہنچے تودو دن کے بعد غزہ،جنگ کے شعلوں میں بے دریغ انسانوں کی مقتل گاہ بن گیااورڈاکٹرخالدآج تنہابڑے تفاخرسے اپنے میزپرپڑی تصاویرالبم کے ہرصفحے پر مسکراتے شہداچہروں کا تعارف کراتے ہوئے کہتاہے کہ یہ سب اکٹھے اللہ کے ہاں رزق پارہے ہیں اورمیراانتظارکر رہے ہیں۔اپنے بڑے بیٹے اوربیٹی کی تصویرکودیکھ کراپنی آنکھوں کی نمی چھپاتے اور کپکپاتے ہونٹوں سے گویا ہواکہ یہ میرے رب کی امانت تھے،اسی کولوٹادیاہے اوریقینا میری راہِ آخرت کے کانٹے ہٹانے کاکام کررہے ہیں ۔
غزہ میں حالیہ جنگ بندی کاذکراوروہاں کے مکینوں کی واپسی کاموضوع شروع ہواتودل تھامنامشکل ہوگیا۔خالدنے ٹی وی اسکرین پر کچھ تازہ ویڈیوکلپ چلانے شروع کردیے جس میں غزہ کے ملبوں کے ڈھیروں پرلوگ دیوانہ واراپنوں کوڈھونڈرہے ہیں۔کہیں کسی بچے کارنگ برنگاسکول بیگ پڑاہے،کہیں جوتا،کہیں لوے کاگلدان،کہیں بیڈیاکرسی کے ٹکڑے،کہیں ٹوٹی ہوئی کھڑکیاں، کہیں پانی کے گلاس کے ٹکڑے اورکہیں کٹے پھٹے کپڑے اورکہیں انسانی اعضا بکھرے پڑے ہیں۔ہاں تمام چیزیں گڈمڈ نظرآتی ہیں۔
یہ مٹی سے اٹی ہوئی اشیاغزہ میں اکثر”پیاروں کی نشانیوں”کے طورپردیکھی جارہی ہیں اورانہیں دیکھ کراندازہ لگایاجاتاہے کہ یہ چیزیں جن افرادکے زیرِاستعمال تھیں ان کی لاشیں کہیں قریب ہی ملبے تلے دبی ہوسکتی ہیں۔قابض اسرائیلی فورسزکے رفح سے دفع ہونے کے بعدسینکڑوں لاشیں گھروں کے ملبے تلے دبی ہوئی ملی ہیں۔فلسطینی حکامِ صحت کااندازہ ہے کہ وہاں10ہزارلوگ تاحال لاپتاہیں۔ایمرجنسی ٹیموں کواکثرکپڑے یادیگراشیادیکھ کرملبے تلے لاشوں کی موجودگی کاعلم ہوتاہے اورجب یہ نشانیاں نظر نہیں آتیں توپھرلاپتا افراد کے رشتہ داروں سے معلومات حاصل کی جاتی ہیں یاپھرملبے کے پاس خون اورانسانی باقیات کی بو سونگھنے کی کوشش کی جاتی ہے۔اسرائیلی حکومت نے تمام خبررساں غیرملکی اداروں کے غزہ میں داخلے اورآزادانہ رپورٹنگ کرنے پرپابندی عائدکررکھی ہے۔ایسے میں لاپتاافرادکوڈھونڈنے والے لوگوں کی کہانیاں دنیاتک پہنچانے کیلئے ڈاکٹرخالدسے زیادہ مستندسہاراکہاں سے لاؤں۔
غزہ اوراسرائیل کے درمیان حالیہ جنگ کے بعدجومناظرسامنے آئے،وہ دل دہلادینے والے اورانسانی ضمیرکوجھنجھوڑنے والے ہیں۔ جنگ کے دوران ہونے والے جانی ومالی نقصانات کے بعد،غزہ کے مکینوں کی اپنے گھروں کوواپسی کامنظرنہایت تکلیف دہ تھا۔اجڑے
ہوئے مکان،ملبے کے ڈھیر،اورپیاروں کی ناقابل شناخت لاشیں غزہ کے باسیوں کیلئے ایک ایسی حقیقت بن چکی ہیں جسے الفاظ میں بیان کرنا مشکل ہے۔
غزہ کی گلیاں اورمحلے اس وقت ایک کھنڈرکی صورت اختیارکرچکے ہیں۔جب لوگ جنگ بندی کے بعداپنے گھروں کو واپس لوٹے توانہیں ایسی تباہی کاسامناکرناپڑاجوانسانی تصور سے بالاترتھی۔کئی خاندان اپنے پیاروں کوکھوچکے ہیں،اورکچھ تواپنے پیاروں کی لاشوں کوبھی شناخت کرنے سے قاصرہیں۔ایسے مناظر،جہاں بھوکے کتوں کوانسانی لاشوں کو کھاتے دیکھاگیا،انسانیت کی بے بسی اورظلم کی انتہاکی عکاسی کرتے ہیں۔
مقامی افرادبہت محتاط اندازمیں ملبے ہٹا رہے ہیں کیونکہ انھیں علم ہے کہ اس مٹی اورپتھروں کے ڈھیرکے نیچے وہ”انسانیت کے پر خچے”ڈھونڈرہے ہیں۔اکثرانہیں ملبے کے نیچے سے ہڈیوں کے ڈھیرکے علاوہ کچھ نہیں ملتا۔اسرائیلی بموں کے پھٹنے سے یہاں اکثر شہدا کے جسم بھی متعدد ٹکڑوں میں تقسیم ہوجاتے تھے۔یہاں ملنے والی ہڈیوں اورکپڑوں کے ٹکڑوں کوکفن میں لپیٹ کررکھا جاتاہے اورایک سفید ریش بزرگ ان کفن نماتھیلوں پر”ناقابلِ شناخت”کالیبل لگارہے ہیں۔
غزہ کے ایک رہائشی جنگ بندی کے بعدجب اپنے گھرلوٹے توانہیں اندرایک ڈھانچہ ملاجس کی کھوپڑی ٹوٹی ہوئی تھی۔ان کے خیال میں یہ لاش وہاں تقریبا6مہینوں سے پڑی ہوئی تھی۔لاش کودیکھ کرپھوٹ پھوٹ کرروتے ہوئے کہہ رہاہے کہ”ہم انسان ہیں اورجذبات رکھتے ہیں۔میں آپ کوبتانہیں سکتاکہ یہ کتنابے بس کردینے والاالمیہ ہے۔یہ لاشیں خوفناک ہیں،ہم دہشت کواپنی آنکھوں سے دیکھ رہے ہیں۔میں قسم کھاکرکہتاہوں کہ یہ ایک دردناک احساس ہے اورمیں اس سب کومحسوس کرکے اس لئے روتاہوں کہ مجھے ان کے ساتھ گزرے ہوئے زندگی کے50سال یادآرہے ہیں اوریہ تمام نوخیزکلیاں بہارآنے سے پہلے مسل دی گئیں”۔
رفح کے ہسپتالوں میں بھی لوگوں کی لمبی قطاریں لگی ہوتی ہیں جواکثراپنے اہلخانہ کی لاشوں کی باقیات وصول کرنے آتے ہیں۔ جنوبی غزہ کے یورپین ہسپتال کے صحن میں کپڑوں کے تھیلوں میں ہڈیوں کامجموعہ اورکپڑے رکھے ہوئے ہیں۔19سالہ عبدالسلام رفح کے رہائشی تھے۔ ان کے چچاذکی کے مطابق وہ شبوراکے علاقے میں لاپتہ ہوئے تھے اوریہ وہ مقام تھا جہاں دورانِ جنگ زندہ بچنابہت مشکل تھا۔اسی لیے ہم عبدالسلام کووہاں ڈھونڈنے نہیں گئے کیونکہ پھروہاں سے ہم زندہ واپس نہیں آسکتے تھے۔ان کے سامنے پڑی ہڈیاں اورکپڑے لاپتہ ہونے والے عبدالسلام کے ہیں۔وہ یہاں ہسپتال کے ایک کارکن کے ساتھ کھڑے عبدالسلام کے بھائی کاانتظارکررہے ہیں۔ ہمیں 99 فیصد یقین ہے کہ یہ لاش عبدالسلام کی ہی ہے لیکن ہم پھربھی حتمی تصدیق کیلئے ان کے بھائی کے منتظرہیں کیونکہ وہ ان کے سب سے قریبی عزیز ہیں اوروہ حتمی طورپربتاسکیں گے کہ یہ جوتے اور پینٹ ان کے بھائی کے ہیں”۔پھرجنوبی غزہ میں ہی واقع پناہ گزینوں کے ایک کیمپ میں رہائش پزیرعبدالسلام کے بھائی ہسپتال پہنچ گئے۔ان کے موبائل میں اپنے لاپتہ بھائی کی ایک تصویرتھی جس میں ان کے جوتے بھی نظرآرہے تھے۔وہ وہاں موجودلاش کے سامنے جھک گئے اور اس پرسے پردہ ہٹایا۔انہوں نے کھوپڑی اورکپڑوں کوچھوااورپھرجوتوں کودیکھا۔ان کی آنکھوں میں آنسو تھے اوربھائی کے جوتوں کو بوسہ دیتے ہی ایک اورلاش کاشناختی عمل مکمل ہوچکاتھا۔یہاں ہی موجودایک اورخاندان کفن نماتھیلوں کوٹٹول رہاتھا۔ان میں ایک بوڑھی دادی تھیں،ایک بیٹاتھا،ایک بیٹی تھی اورایک شیرخواربچہ،باقی خاندان کے دودرجن افراکےآنکھوں کے سامنے پرخچے اڑتے ہوئے دیکھ کرضعیف وناتواں دادی ان بچوں کے ساتھ کھڑی آسمان کی طرف منہ کرکے نجانے کیا باتیں کررہی تھی ۔
اس گروہ میں بچے کوسب سے پیچھے رکھا گیاتھااوربزرگ خاتون اوران کاپوتاایک کفن نماتھیلے کودیکھ رہے تھے۔وہ اس تھیلے کوکچھ لمحوں تک دیکھتے رہے اورپھردکھ میں ایک دوسرے کے گلے لگ کررونے لگے۔اس کے بعدہسپتال کے کارکنان کی مدد سے یہ خاندان ایک لاش کی باقیات اپنے ساتھ لے گیا۔ان سب کی سسکیاں سنی جاسکتی تھیں لیکن وہ باآواز بلند نہیں رورہے تھے۔13سالہ آیاالدبیح غزہ کے شمال میں اپنے خاندان اوردیگر ہزاروں پناہ گزینوں کے ساتھ ایک سکول میں رہائش پذیرتھی۔وہ اپنے والدین کے نوبچوں میں سے ایک تھی۔ اس کے خاندان کے مطابق غزہ میں جنگ کے ابتدائی دنوں میں آیاسکول کی اوپری منزل پر بنے باتھ روم گئی اوراسے ایک اسرائیلی اسنائپر نے سینے پرگولی ماردی۔ تاہم اقوامِ متحدہ کے دفتربرائے انسانی حقوق کے مطابق جنگ کے دوران”اسرائیلی فوج کی جانب سے گنجان آباد علاقوں میں شدیدفائرنگ کی جاتی تھی جس کے نتیجے میں یہاں غیر قانونی ہلاکتیں ہوتی تھی جس میں غیرمسلح راہگیربھی شامل ہوتے تھے”۔
آیا کے خاندان نے اسے اسکول کے پاس ہی دفنادیا۔اس کی43سالہ والدہ لیناالدبیح نے اسے ایک کمبل میں لپیٹ دیاتھاتاکہ اگراس کی قبر کے ساتھ کوئی چھیڑچھاڑکرے تواس کی لاش”بارش اورسورج کی روشنی سے محفوظ رہ سکے”۔جب اسرائیلی فوج نے سکول کاکنٹرول سنبھالا تولیناالدبیع وہاں سے غزہ کے جنوبی علاقے میں منتقل ہوگئیں۔ان کے پاس اپنی بیٹی کی قبرسے دورجانے کے علاوہ کوئی اورراستہ بھی نہیں تھا،تاہم ان کویہ امیدتھی کہ وہ بعد میں یہاں دوبارہ آکراپنی بیٹی کی باقیات کودوبارہ ڈھونڈیں گی اور باقاعدہ ان کے کفن دفن کاانتظام کریں گی۔ لینا الدبیع اپنی بیٹی کے بارے میں بات کرتے ہوئے کہتی ہیں کہ:آیاایک بہت مہربان لڑکی تھی،ہرکوئی اس سے محبت کرتاتھااور وہ سب سے محبت کرتی تھی۔ وہ پڑھائی میں بہت اچھی تھی اورہمیشہ سب کابھلاچاہتی تھی”۔جب اس علاقے میں جنگ بندی ہوئی تو لیناالدبیع وہاں موجوداپنے رشتہ داروں کواپنی بیٹی کی قبردیکھنے کوکہااوروہاں سے انہیں جوخبرملی وہ دِل دہلادینے والی تھی۔
”ہمیں بتایاگیاکہ اس کاسرکہیں اورہے،دھڑکہیں دوسری جگہ اورپسلیاں کہیں اور۔جوعزیزاس کی قبردیکھنے گئے تھے انہوں نے ہمیں یہ سب چیزیں تصویروں میں دکھائیں۔جب میں نے اسے دیکھاتومیں سمجھ ہی نہیں پائی کہ اس کاجسم قبرسے کیسے باہرآیا اورکتوں نے اسے کیسے کھالیا؟میں اپنے حواس پرقابو نہیں پاسکی”۔ لیناالبدیح کے خاندان والوں نے ان کی بیٹی کی ہڈیاں سمیٹ لی ہیں اوراب آیاکی باقیات کوباقاعدہ ایک قبرمیں دفن کیاجائے گا۔
غزہ میں جنگ بندی توہوگئی ہے لیکن لیناالبدیح کے دکھ کاکوئی اختتام نہیں نظرآتا۔ان کاکہناہے کہ:میں اس کی لاش کوقبرسے نکال کر اپنے ساتھ نہیں لے جاسکتی تھی۔بتامیں اسے کہاں لے کرجاتی؟تاہم اس حقیقت کوتسلیم کرناپڑرہاہے کہ پچھلے کئی مہینوں سے یہ لاشیں یہاں پڑی ہوئی ہیں لیکن سال سے زائدبے گوروکفن لاشوں کی سڑاندکی بدبوکی بجائے یہاں ایک عجیب قسم کی خوشبو دل وجاں کومعطرکررہی ہے۔ یہ شہدا سے رب کاوعدہ پوراہوگیاہے۔یہ سب کچھ نہ صرف غزہ کے عوام بلکہ پوری انسانیت کیلئے ایک کرب ناک منظر پیش کرتاہے۔بے
گھرافراد،یتیم بچے،اورزخمی معذورافرادان مظالم کاجیتاجاگتا ثبوت ہیں۔سوال یہ ہے کہ ان مظلوموں کوانصاف کب ملے گا؟
اس جنگ کے دوران انسانی حقوق کی سنگین خلاف ورزیاں دیکھنے میں آئیں۔نہتے عوام پربمباری،طبی مراکزاوراسکولوں کی تباہی، اور معصوم بچوں کی ہلاکتیں ان مظالم کامحض ایک حصہ ہیں۔انسانی حقوق کے علمبرداروں اورعالمی برادری کی خاموشی نے مزیدسوالات کو جنم دیا ہے۔اقوامِ متحدہ،یورپی یونین اوردیگربین الاقوامی ادارے اس جنگ میں غزہ کے عوام کوتحفظ فراہم کرنے میں ناکام رہے۔یہ خاموشی مظلوموں کی تکالیف میں اضافے کاباعث بنی اورجنگ کے بعدکے حالات نے ان کے زخموں پر مزید نمک چھڑک دیا ۔اس انسانی المیے کے پیچھے براہ راست اوربالواسطہ کئی عناصرذمہ دارہیں۔سب سے پہلے،ان ظالم عناصرکودیکھناہوگاجواس تباہی کے ذمہ دارہیں۔جدیدترین اسلحے کے استعمال، شہری آبادیوں پرحملوں،اورمعصوم جانوں کے قتل میں ملوث افراداورریاستیں انصاف کے کٹہرے میں لائی جانی چاہئیں۔لیکن افسوس کی بات یہ ہے کہ کئی طاقتورممالک،جوخودکو انسانی حقوق کے محافظ کہتے ہیں،درپردہ ان مظالم کے مرتکب افرادکو اسلحہ فراہم کرتے ہیں۔
یہ ممالک نہ صرف غزہ کے عوام کے خلاف ہونے والے جرائم پرخاموش رہتے ہیں بلکہ ظالم قوتوں کومالی اورعسکری مدد فراہم کرتے ہیں۔ ان کی اسلحہ سپلائی اورسیاسی حمایت نہ صرف ان مظالم کوجاری رکھنے کاسبب بنتی ہے بلکہ انصاف کے قیام میں بھی رکاوٹ پیداکرتی ہے۔ خودکودنیاکی سب سے بڑی جمہوریت کہنے والاانڈیاتواس سفاکی میں برابرکاشریک رہا کہ اس نے باقاعدہ اپنے لوگوں کواسرائیلی فوج میں کرائے کے سپاہیوں کے طورپربھیجاجنہوں نے اسرائیلی فوجیوں کے ساتھ ساتھ فلسطینی عورتوں، بزرگوں اوربچوں کوہولناک طریقے سے مارنے میں پوراحصہ لیا۔یہ رویہ انسانی حقوق کی سنگین خلاف ورزیوں کومزیدہوادیتا ہے اورمظلوموں کے زخموں کوگہراکرتاہے۔
غزہ کے ملبے کوہٹانااوردوبارہ آبادکاری ایک بڑاچیلنج ہے،جس کیلئے ماہرین نے مختلف پہلوؤں پرزوردیاہے۔ماہرین کاکہنا ہے کہ ملبے کوہٹانے کے دوران ماحولیاتی اثرات کا خاص خیال رکھناہوگا۔ملبے میں موجود خطرناک مواد،جیسے ایسبیسٹوس اوردیگر زہریلے اجزا،کومحفوظ طریقے سے ٹھکانے لگاناضروری ہے تاکہ عوام کی صحت پرمنفی اثرات نہ پڑیں۔ تعمیرنوکے عمل میں مقامی مواداورکاریگروں کااستعمال نہ صرف اقتصادی طورپرفائدہ مندہوگابلکہ اس سے روزگارکے مواقع بھی پیداہوں گے۔ماہرین کے مطابق غزہ کی مکمل بحالی کیلئے اربوں ڈالرزدرکارہوں گے۔50ہزارملین ٹن سے زائدملبہ ہٹانے کیلئے کئی دہائیوں کا وقت لگ سکتاہے۔اقوامِ متحدہ اوردیگربین الاقوامی امدادی ادارے اس حوالے سے اہم کرداراداکرسکتے ہیں لیکن ان کے موجودہ رویے سے امیدکم ہے۔عالمی مالیاتی ادارے اورمسلم ممالک کواس بحران کے حل کیلئے خصوصی فنڈقائم کرناہوگا۔
جنگ کے متاثرین کی نفسیاتی بحالی بھی تعمیرنوکااہم حصہ ہے۔ماہرین تجویزکرتے ہیں کہ ایسے مراکزقائم کیے جائیں جہاں متاثرین کو نفسیاتی معاونت فراہم کی جائے تاکہ وہ اپنی زندگی کودوبارہ معمول پرلاسکیں۔جنگ کے نتیجے میں تمام اسکول اور ہسپتال تباہ ہوچکے ہیں۔ بچوں کی تعلیم اورصحت کی بحالی کیلئے ہنگامی بنیادوں پرکام کرنے کی ضرورت ہے۔ موبائل اسکول اور عارضی طبی مراکزکاقیام اس وقت کی اہم ضرورت ہے۔ماہرین کامانناہے کہ تعمیرنوکاعمل محض عمارتیں کھڑی کرنے تک محدودنہیں ہوناچاہیے بلکہ اسے ایک طویل مدتی منصوبہ بندی کے تحت کیاجاناچاہیے،جس میں تعلیم،صحت اورمعیشت کی بحالی شامل ہو۔
غزہ کے عوام کیلئے انصاف کی فراہمی ایک مشکل لیکن ضروری عمل ہے۔جنگ کے دوران ہونے والے جرائم کی تحقیقات اور ذمہ داران کو کٹہرے میں لاناانتہائی اہم ہے۔جنگی جرائم کے مرتکب افرادکوانصاف کے کٹہرے میں لانے کیلئے عالمی سطح پرایک مضبوط اورغیر جانبدار نظام کی ضرورت ہے لیکن یہ عمل کئی چیلنجزسے گھراہواہے۔طاقتورممالک کے سیاسی مفادات،اقوامِ متحدہ کی کمزورحیثیت،اورانصاف کے عمل میں سست روی جیسے عوامل انصاف کی راہ میں رکاوٹ بنے ہوئے ہیں۔ان مظالم کی روک تھام اورغزہ کے عوام کو ایک محفوظ مستقبل دینے کیلئے ہمیں درج ذیل اقدامات پر غور کرنا ہوگا۔
٭پہلا کام عالمی برادری اس بات کویقینی بنائے کہ جنگ کے دوران ہونے والے مظالم کی شفاف تحقیقات ہوں اورجنگی جرائم کے مرتکب افرادکوسزادی جائے۔یہ اقوامِ متحدہ اوردیگر عالمی اداروں کی ذمہ داری ہے کہ وہ انصاف کے عمل کویقینی بنائیں۔
٭دوسراکام جنگ کے بعدغزہ کی تعمیرِنواورمتاثرین کی بحالی کیلئے عالمی سطح پرہنگامی بنیادوں پرامدادی سرگرمیوں کاآغازہونا چاہیے۔بے گھرافرادکورہائش فراہم کی جائے،اور صحت، تعلیم،اوربنیادی سہولیات کی فراہمی یقینی بنائی جائے۔
٭اس جنگ کابنیادی مسئلہ فلسطین اوراسرائیل کے درمیان جاری تنازع ہے۔جب تک اس تنازع کومستقل طورپرحل نہیں کیاجاتا،جنگ اورخونریزی کایہ سلسلہ جاری رہے گا۔ ٭عالمی رہنماؤں کواس مسئلے کے پائیدارحل کیلئے سنجیدہ اقدامات اٹھانے ہوں گے۔دنیابھر کے عوام کوغزہ میں ہونے والے مظالم کے بارے میں شعوردیناضروری ہے۔
٭میڈیا کواپنی ذمہ داری نبھاتے ہوئے ان مظالم کودنیا کے سامنے لاناہوگاتاکہ عوامی دباعالمی برادری کوحرکت میں لاسکے۔مسلم دنیاکومتحدہوکرفلسطین کے مسئلے کوعالمی سطح پراجاگر کرنا ہوگا۔یہ اتحاد نہ صرف سیاسی بلکہ اقتصادی اورسفارتی سطح پربھی ضروری ہے تاکہ عالمی برادری کواس مسئلے کے حل کی طرف راغب کیاجاسکے۔
٭غزہ کے عوام کی حالت زاراورجنگ کے بعدکے مناظرہمیں انسانی حقوق،انصاف،اورعالمی ضمیرکے حوالے سے کئی سوالات پر غورکرنے کی دعوت دیتے ہیں۔یہ وقت ہے کہ عالمی برادری اس ناانصافی کے خلاف متحدہواورایک مضبوط اورمؤثرلائحہ عمل اختیارکرے تاکہ مستقبل میں ایسے مظالم کی روک تھام ہوسکے۔
٭انصاف کی فراہمی صرف ایک اخلاقی ضرورت نہیں بلکہ انسانی وقاراورامن کے قیام کی بنیادہے۔جب تک غزہ کے مظلوموں کوانصاف نہیں ملتا،عالمی امن کاخواب شرمندہ تعبیرنہیں ہوسکتا۔ہمیں مل کران مظالم کے خاتمے کیلئیجدوجہدکرنی ہوگی تاکہ آنے والی نسلیں ایک پرامن اورمحفوظ دنیامیں جی سکیں۔
۔۔۔۔۔۔۔۔۔۔۔۔۔

متعلقہ خبریں