مجھے قتل کیا گیا تو ذمہ دار ی الطاف حسین پر عائد ہوگی: عامر لیاقت

ایم کیوایم کے سابق رہنما عامر لیاقت حسین نے ایم کیوایم کو چھوڑنے کے اچانک اعلان کے بعد اب یہ انکشاف کیا ہے کہ اُنہیں مختلف نمبروں سے قتل کی سنگین دھمکیا ں دی جارہی ہیں۔ اور اگر اُنہیں قتل کیا گیا تو اس کے ذمہ دار الطاف حسین ہوں گے۔

عامر لیاقت نے الطاف حسین کی طرف سے پاکستان مخالف نعرے لگائے جانے کے باوجود اُس روز الطاف حسین کا دفاع کیا تھا۔ اُنہوں نے اپنے اس کردار کا جواز پیش کرتے ہوئے کہا ہے کہ کراچی میں جو ہنگامے ہورہے تھے میں ان کو روکنے کی کوشش کررہا ہوں لیکن یہ احسان فراموش لوگ ہیں، میں اس قوم کے لیے لڑتا رہا لیکن مجھے فون پر بوریوں کی دھمکیاں دی جارہی ہیں۔عامر لیاقت کا کہنا تھا کہ مجھے نامعلوم نمبروں سے آنے والے فون پر کہا جارہا ہے کہ تم مصطفیٰ کمال سے بھی بڑے غدار ہو اور تمہارا حال اس سے بھی برا ہوگا۔ انہوں نے کہا کہ میں مہاجر کے لیے لڑتا رہا لیکن یہاں مہاجرکا کوئی مسئلہ نہیں، میں گزشتہ تین ماہ سے صرف بے وقوف بنتا رہا اور الطاف حسین کی ناقابل برداشت باتیں سنتا رہا۔

سابق متحدہ رہنما کا کہنا تھا کہ اے کاش فاروق ستار بھائی الطاف حسین اور اس پارٹی سے مکمل دوری اختیار کرلیں اور اگر وہ وطن سے مخلص ہیں کہ تو ابھی پریس کانفرنس کریں اور کہیں کہ الطاف حسین سے ہمارا کوئی واسطہ نہیں۔ عامر لیاقت نے کہا کہ ایم کیوایم پاکستان کچھ بھی نہیں ہے ۔ یہ سب گیم پاناما لیکس کو بچانے اور اس پر سے توجہ ہٹانے کے لیے کیا جارہا ہے۔

واضح رہے کہ الطاف حسین کے پاکستان مخالف بیان کے بعد ڈاکٹر عامر لیاقت کو رینجرز نے اپنی تحویل میں لے لیا تھا۔ اگلےروز اُن کی رہائی عمل میں آئی تھی ۔ جس کے بعد وہ کراچی پریس کلب میں اُس پریس کانفرنس میں شریک ہوئے تھے جس میں ڈاکٹر فاروق ستار نے الطاف حسین کے بیان کی مذمت اور ایم کیوایم کے فیصلے لندن کے بجائے اب کراچی سے کیے جانے کا اعلان کیا تھا۔ مگر اچانک عامر لیاقت حسین نے ایک ٹی وی پروگرام میں ایم کیوایم چھوڑنے کا اعلان کرتے ہوئے کہا تھا کہ “میں ایسے شخص کا ساتھ نہیں دے سکتا جس نے پاکستان مخالف باتیں کی ہوں، جبکہ اب کوئی محب وطن مہاجر الطاف حسین کے لیے باہر نہیں آئے گا۔”

عامرلیاقت حسین نےاب ایک روز بعد خو دکو ملنے والی دھمکیوں کا انکشاف کرتے ہوئے یہ بھی کہا ہے کہ “ایم کیو ایم پاکستان کچھ نہیں ہے، ڈاکٹر فاروق ستار کو واضح طور پر الطاف حسین سے لاتعلقی کا اظہار کرنا ہوگا، اگر وہ ایسا کرتے ہیں تو میں انہیں گلے لگاؤں گا۔”