کامن ویلتھ گیمز:اگرمگرکاکھیل ختم ،قومی ہاکی ٹیم میڈلز کی دوڑ سے باہر

کامن ویلتھ گیمز میں پاکستانی ہاکی ٹیم میڈلزکی دوڑ سے باہر ہوگئی پول ’’بی‘‘ میں انگلینڈ اور بھارت کی فتوحات سے اگر مگر کا چکر ختم ہوگیا۔ پاکستان نے پول ’’بی‘‘ میں ویلز،بھارت اور انگلینڈ کیخلاف میچز برابر کھیلے، ٹیم کی سیمی فائنل کھیلنے کی امیدیں باقی رہنے کا انحصار اس بات پر تھا کہ ملائیشیا اور بھارت کا میچ ڈرا ہو، پاکستان ملائیشیا کو ہرائے جبکہ بھارتی ٹیم آخری میچ میں انگلینڈ کے ہاتھوں شکست کا شکار ہو جائے، بلوشرٹس نے اس کی نوبت نہیں آنے دی اور ملائیشیا کو 2-1 سے مات دیتے ہوئے 7پوائنٹس کے ساتھ سیمی فائنل میں جگہ بنا لی، انگلینڈ نے ویلز کو 3-2 سے زیر کرکے اتنے ہی پوائنٹس لے کر فائنل فور میں رسائی پائی، پاکستانی ٹیم بدھ کوملائیشیا کیخلاف میدان میں اترے گی۔ اس میچ میں فتح وشکست سے قطع نظرگرین شرٹس کا ایونٹ میں سفر ختم ہوچکا۔

آسٹریلیا کے شہر گولڈ کوسٹ میں جاری کامن ویلھت گیمز میں منگل کو کھیلے گئے ہاکی کے مقابلوں میں انگلینڈ نے ویلز اور بھارت نے ملائیشیا کو شکست دے کر پول بی میں 7 نمبروں کے ساتھ مشترکہ طور پر پہلی پوزیشن حاصل کی۔پاکستان نے اب تک ایونٹ میں کھیلے گئے اپنے تینوں میچ ڈرا کیے ہیں جہاں ٹیم نے ویلز کے خلاف اپنا افتتاحی میچ 1-1 سے ڈرا کیا جس کے بعد بھارت اور انگلینڈ کے خلاف میچ 2-2 گول سے برابر رہے۔

پاکستان کا ایونٹ میں ملائیشیا سے میچ باقی ہے لیکن فتح حاصل کرنے کی صورت میں بھی قومی ٹیم اگلے راؤنڈ میں نہیں پہنچ سکے گی جہاں دونوں ہی ٹیموں کے 3، 3 پوائنٹس ہیں۔دوسری جانب آسٹریلیا اور نیوزی لینڈ کی ٹیمیں فتوحات کی ہیٹ ٹرکس مکمل کر کے کامن ویلتھ گیمز مینز ہاکی ایونٹ کے سیمی فائنل میں پہنچ گئیں۔

منگل کو کھیلے گئے گروپ اے کے ایک میچ میں نیوزی لینڈ نے شاندار کارکردگی کا مظاہرہ کرتے ہوئے سکاٹ لینڈ کو 2 کے مقابلے میں 5 گولز سے ہرا کر مسلسل تیسری کامیابی حاصل کی اور اس کے ساتھ ہی سیمی فائنل میں جگہ بنا لی۔کیویز کی طرف سے رسل نے شاندار ہیٹ ٹرک اسکور کر کے ٹیم کی جیت میں کلیدی کردار ادا کیا۔اسی گروپ کے دوسرے میچ میں آسٹریلیا نے کینیڈا کو 4-0 گولز سے شکست دے کر فتوحات کی ہیٹ ٹرک مکمل کرتے ہوئے سیمی فائنل میں پہنچنے کا اعزاز حاصل کیا۔

Electrolux