جنوبی کشمیر کے دہشت ناک حالات کی اصل کہانی

جمعه 21 اپریل 2017 جنوبی کشمیر کے دہشت ناک حالات کی اصل کہانی

قارئین کو اچھی طرح یاد ہو گا کہ 2016ء کے عوامی احتجاج سے قبل بھارتی فوج کے ایک اعلیٰ ترین فوجی آفیسرجنرل ڈوانے ببانگ دہل یہ بات کہی تھی کہ جنوبی کشمیر ہمارے ہاتھ سے نکل چکا ہے اور یہاں ہماری حالت بطخوں کے مانند ہو چکی ہے ۔عوام کھل کر عسکریت پسندوں کی حمایت کرتے ہیں حتیٰ کہ وہ ان حساس علاقوں تک احتجاج کرنے پہنچ جاتے ہیں جہاں عسکری نوجوانوں اور فوج کے بیچ براہِ راست جنگ چل رہی ہوتی ہے۔ المیہ یہ کہ بھارت کے حکمران مسئلہ حل کرنے میںبعض عیاں وجوہات کی بنا پرٹال مٹول سے کام لے رہے ہیں ۔ جن میں اہم ترین وجہ اس کی نااہلیِ دوم دلی میں عرصہ دراز سے براجمان وہ بیوروکریسی ہے جن کی مسئلہ کشمیر لٹکائے رکھنے سے بہت ساری مرادیں پوری ہوتی ہیں اس لیے کہ مسئلہ کشمیر کا زندہ رہنا بہت سارے لوگوں کے لیے ’’سونے کے انڈے دینے والے مرغی‘‘کی شکل اختیار کر چکا ہے۔مسئلہ کشمیر 1947ء کا ناسور ہے ۔ایک آزاد ریاست کے نااہل حاکم مہاراجہ ہری سنگھ نے جموں و کشمیر بھارت کی جھولی میں ڈال کر ’’بھارت ماتا‘ کی روح توخوش کردی مگر یہ کسے معلوم تھا کہ ’’خود غرضی ‘‘پر مبنی یہ سودا بھارت کے لیے گلے کی ہڈی بن جائے گا۔تب سے لے کر آج تک بھارت نے بھرپور قوت کے ساتھ کشمیریوں کو دبانے میں کوئی کسر باقی نہیں چھوڑی ۔یہاں تک کہ معاملہ 1987ء کے الیکشنوں تک پہنچ گیا کہ ایک دھاندلی نے کشمیر کے حالات کو ایک اجنبی رُخ پر ڈال دیا ۔نوجوانوں نے بندوق کا راستہ اختیار کر لیا اور ہر سُو انہی کا راج قائم ہوا،یہاں تک کہ 1996ء میں بھارت نے تمام ترروایتی اور غیر روایتی طریقے تک اختیار کرتے ہو ئے ووٹ ڈلوا کر نیشنل کا نفرنس کی حکومت قائم کروالی ۔اسی دور میں’’ اخوان اور ایس، اُو، جی‘‘نے کشمیر کے چپے چپے پر کشمیریوں کا بے تحاشہ خون بہایاحتیٰ کہ واجپائی سرکار نے نیشنل کانفرنس کی مین اسٹریم سیاست میں انفرادیت اور وحدت کو ختم کرنے کا پروگرام تشکیل دیدیا ۔ان کی نظر مرحوم مفتی محمدسعید پر پڑی جو سابق وزیر داخلہ ہونے کے سبب قابل اعتماد ضرور تھے مگر کشمیر یوں کے لیے وہ ایک گمشدہ شخص کی مانند تھااس لیے کہ پورے دس برس تک کشمیر پر ایک آدھ بیان بھی شہ سرخی میں شائع ہونے کے قابل نظر نہیں آیا بلکہ بعض دانشور یہاں تک کہتے ہوئے سنے گئے کہ لبریشن فرنٹ کے ہاتھوں ’’ربیعہ سعید‘‘کے اغوا اور چند نوجوانوں کی اس کے بدلے میں رہائی مفتی سعید کے لیے ایک گہرے گھاؤ کے مانند تھا جس کا بعد میں کھل کر انتقام لیا گیا ۔اسی بیچ ان کی بیٹی اور آج کی وزیر اعلیٰ محبوبہ مفتی سامنے آئی اور اس نے اپنی کہانی ایک دوسرے انداز میں شروع کرتے ہوئے سب کے دل جیت لیے۔
محبوبہ مفتی ان دنوں ہر اس گھر میں پہنچ کر آنسو بہانے لگتی تھی جن کا لاڈلہ فوج یا پولیس کے ہاتھوں قتل ہوجاتا تھا اورکھل کر یہ تک کہتی تھی کہ ’’ایک ملی ٹینٹ‘‘کا بدلہ اس کے گھر والوں سے کیوں لیا جاتا ہے ؟محبوبہ جی نے بہت سارے ایسے نوجوانوں کو رہائی دلائی جوان دنوں فوج یا پولیس کے ہاتھوں گرفتار ہو جاتے تھے ۔اخوان،فوج اور ایس او جی کی زیادتیوں پر جم کر بولنا اس کی شناخت بن چکا تھا۔ یہاں تک کہ 2002ء کے الیکشن بہت قریب آنے لگے تو مفتی سعید اسی ہمدردی بٹورنے والی بیٹی کی معیت میں چھاجانے لگے اور تحریکی افراد کے گھروں میں جاکر تعزیت اور خبر گیری میں بھی شدت آنے لگی ۔اسی بیچ جنوبی کشمیر میں افواہوں کا بازار گرم ہونے لگا کہ ’’کہتے ہیں‘‘کا لفظ ہر محفل اور مجلس کی زینت بن گیا ۔پروپیگنڈا بازوں نے زمین و آسمان کے قلابے ملاکر پراسرارباتوں کے ہجوم میںنئے نئے افسانے تراشے کہ ’’کہتے ہیں‘‘محبوبہ جی کل فلاں جگہ فلاں فلاں حزب کمانڈر سے ملی‘‘ اس طرح کی خبروں نے شہداء کے گھروں میں جاکر رونے والی محبوبہ مفتی کے لیے ہمدردی پیدا کر دی اور لوگ ان ایام میں اس کے باپ اور اس کی ہندوستان نوازی کو بالکل بھول چکے تھے ۔ مجاہدین کی جانب سے نہ ہی ان ملاقاتوں کی تردید ہوئی نا ہی تائید مگر عوام نے خاموشی کو سچائی پر محمول کرتے ہو ئے ایک نئی صورتحال کو جنم دیا ۔سابق گورنرِکشمیر جنرل سنہا نے منصب سے سبکدوشی کے بعد کئی مواقع پر ان باتوں کی تائید کی کہ مفتی فیملی کے عساکر کے ساتھ گہرے روابط تھے ۔میراذاتی خیال ہے اور غلط بھی ہوسکتا ہے کہ فوجی مظالم کے بعد جب معاملہ اخوان اور ایس او جی کا کھڑا ہوا تو شاید عسکری نوجوان اور ان کی مقامی قیادت نیشنل کو ہٹاکر کسی ایسی جماعت کو سامنے لانا چاہتے تھے جوفوجی ،اخوانی اور ایس او جی کے مظالم پر روک بھی لگا سکے اور مسئلہ کشمیر پر بات چیت کے لیے میدان بھی ہموار کر سکے ۔
2002ء کے اسمبلی الیکشن قریب آنے لگے تو 1987ء کے مسلم متحدہ محاذ کے انتخابی نشان’’قلم دوات اور سبز پرچم‘‘نے کریک ڈاؤنوں،چھاپوں،ٹارچر،گرفتاریوں سے خوف زدہ اور فوج،اخوان اور ایس ،او،جی کے مظالم سے تنگ آئے عوام کی بالعموم اور تحریک نواز وں کی بالخصوص ہمدردیوں کو ’’ضدِ نیشنل کانفرنس‘‘میں ’’مفتی سعید کی طرف موڑ دیا ۔نتیجہ یہ نکلا کہ ایک نئی نویلی تنظیم انتہائی قلیل مدت میں جنوبی کشمیر کی مین اسٹریم سیاست پر چھا گئی ۔مفتی محمد سعید اپنی بیٹی کو ساتھ لیکر 1989ء سے قبل کے سیاسی جلسوں جلوسوں جیسی صورتحال کو جنم دینے میں کامیاب ہو گئے ۔ ہر جگہ ان کو خوش آمد کہا گیا ۔انہوں نے ان دور دراز علاقوں میں بھی کامیاب جلسے منعقد کیے جہاں نیشنل کانفرنس کا جانا کسی خواب سے کم نہیں تھا اس لیے کہ جنوبی کشمیرپر عسکری نوجوانوں کا خاصا اثر ابھی تک موجود تھا ۔ پی ڈی پی کے بالکل برعکس نیشنل کانفرنس کے لیے ’’مجاہدین‘‘نے تمام ترسیاسی راستے مسدود اورمشکل کر دیے تھے اور اس کی وجہ نیشنل کانفرنس کا وہ انتقام تھا جس کے لیے نیشنل کانفرنس ہمیشہ مشہور رہی ہے ۔ انہوں نے 1996ء کے الیکشن(جو صرف جبر و تشدد سے منعقد ہو سکے) جیتتے ہی تمام تر مخالفین کو زیر کرنے میں کوئی کسرباقی نہیں چھوڑی حتیٰ کہ جنوبی کشمیر میں اخوانی نیشنل کانفرنسیوں کی سفارش فوج اور پولیس کی طرح قبول کرتے تھے ۔جس کے مطالب جنوبی کشمیر کے باسی خود ہی سمجھ جاتے تھے ۔آزادی پسندوں کے علاوہ جس بے دردی کے ساتھ جماعت اسلامی والوں کو بازاروں میں ایک ایک کر کے نشانِ عبرت بنانے کی کوشش کی گئی وہ ایک الگ روح فرسا داستان ہے ۔یہ تمام تر وحشت و بربریت اس وقت اپنے جوبن پر تھی جب ریاست میں پہلی بار نیشنل کانفرنس برسرِاقتدار آچکی تھی اور عوام اس ظلم سے’’ کسی بھی طرح‘‘ نجات کے خواہش مند تھے ۔ ظلم سے’ نجات کی خواہش‘ ایک اہم عامل کے طور پر ابھری ،جس نے پی،ڈی،پی کو جنوبی کشمیر کی مین اسٹریم سیاست میں غلبہ عطا کردیا۔اس طرح ایک خاص آلودہ فضا میں پی،ڈی،پی سامنے آئی اور مظلوموں کی آواز بن کر قلیل وقت میں چھا گئی ۔
2002ء کے الیکشنوں میں پی،ڈی،پی ایک اہم پارٹی کے طور پرابھر کر سامنے آئی ۔جس میں مظالم سے تنگ آئے عوام کے علاوہ آزادی پسند حلقوں کی ہمدردی اہم ترین اسباب شمار کیے جا سکتے ہیں ۔اب وہی مفتی محمد سعید کشمیر کے وزیر اعلیٰ بن چکے تھے جس کو اپنے حلقہ انتخاب بجبہاڈہ میں بھی پوری طاقت اور زور لگانے کے باوجود بھی مڈل پاس نیشنل کانفرنس امیدوار عبدالغنی ویری کے مقابلے میں کبھی بھی جیت مقدر نہیں بن سکی تھی۔یہیں سے مفتی سعید جیسے منجھے ہو ئے سیاستدان اور دوسروں کو خاطر میں نہ لانے والی بیٹی سے خطرناک سیاسی غلطیوں کا بھی آغاز ہوا ۔ان کی پہلی فاش غلطی یہ تھی کہ جس مظلوم عوام نے انہیں اپنے ووٹ سے اقتدار کی کرسی تک پہنچا دیا وہ ان کی نفسیات کو پھر سمجھنے میں چوک گئی ۔انہوں نے پورے کشمیر میں اپنے پرانے کانگریسی دوستوں کے علاوہ ان ظالم اشخاص( جن کے ہاتھوںچالیس برس تک آزادی اور اسلام پسندکچلے جا چکے تھے)کو پارٹی میں نہ صرف جگہ دیدی بلکہ اعلیٰ ترین مناصب پر فائز کر کے انتہائی قلیل وقت میں آزادی اور اسلام پسند حلقوں کو غلط پیغام دیدیا۔پھر المیہ یہ کہ جن سوشلسٹ نظریات کے لیے مفتی سعید 1990ء سے قبل پہلے پہچانے جاتے تھے کو 2002ء میں کرسی ملتے ہی جاگیر داروں ،وڈیروں اور سرمایہ داروں کوپارٹی میں شامل کرتے ہی روند ڈالا ۔نتیجہ یہ نکلا کہ جس طرح ایک وقت میں نیشنل کانفرنس کو جاگیرداروں اور وڈیروں کے خلاف ایک منظم سیاسی قوت کے طور پر پہچانا جاتا تھا اور بعد میں اس کا ہر لیڈر اور کارکن خود جاگیردار بن گیا بالکل یہی طریقہ پی،ڈی،پی نے اپنا کر نیشنل کانفرنس سے اپنے آپ کو ممتاز نہیں کیا ۔
2002ء کے بعد بے شک اخوان ،فوج اور پولیس کا تشدد کم ہوا مگر ’’مجاہدین ‘‘کے حوالے سے میدانی سطح پر کوئی تبدیلی نہیں آئی ۔نیشنل کانفرنس نے نہ صرف حزب المجاہدین اور مرکزی حکومتی نمائندوں کے بیچ براہِ راست مذاکرات کرانے کے لیے مناسب اقدامات اٹھائے بلکہ فریقین کوتمام تر سہولیات بہم پہنچائیں حتیٰ کہ ایک تاریخی جنگ بندی بھی وجود میں آئی اور حزب المجاہدین کے اس مثبت قدم کے جواب میں اس وقت کے وزیر داخلہ اور نائب وزیر اعظم لال کرشن ایڈوانی نے پارلیمنٹ میں خواشگوار ماحول کو تقویت فراہم کر نے کے لئے جنگ بندی کو قبول کر لیا ۔پی،ڈی،پی حکومت آتے ہی حزب المجاہد ین کی یہی مذاکراتی ٹیم سوائے ایک کے سب مارے گئے حتیٰ کہ حزب المجاہدین کے ایک مشہور دانشور اورمعروف قلمکار’’ کمانڈر مسعود‘‘ کو دورانِ حراست تشدد سے قتل کیا گیا۔ ان کے علاوہ جنوبی کشمیر میں ہی حزب المجاہدین کے انتہائی بااثر کمانڈرانجینئر محمود الزمان ،ڈویژنل کمانڈر قمر الزمان ،ڈویژنل کمانڈر سہیل فیصل اور سینکڑوں اراکین بھی مارے گئے ۔حزب المجاہدین پر ان ہلاکتوں کا اثر جو ہونا تھا وہ تو ہوچکا مگر مفتی سعید یہ تک بھول چکے تھے کہ ضلع اسلام آباد میں ہی جماعت اسلامی عسکریت سے بہت پہلے سابق ایم ایل اے شہید عبدالرزاق کو باربار بحیثیت امیدوار اپنے ووٹ بنک کے بل بوتے پر فتح سے ہمکنار کرانے میں کامیاب رہتی تھی اور تو اور 1987ء کے مشہور الیکشنوں میں کانگریس کی سرپرستی میں نیشنل کانفرنس کی تمام تر سینہ زوریوں کے باوجود بھی ضلع اسلام آباد کی پانچ نشستوں میں سے تین پرمسلم متحدہ محاذ کے امیدوارغلام نبی سمجھی،محمد سعید شاہ اور عبدالرزاق میر کامیاب ہوئے تھے ۔یہ حکمرانوں کا پرانا مرض ہے کہ اقتدار کی کرسی پر بیٹھتے ہی وہ سچائی اور زمینی حقائق کوبھول کر خوابوں میں رہنا پسند کرتے ہیں۔
2014ء کے انتخابات میں’ چھا جانے اور اپنے بل بوتے پر حکومت بنانے کا موڈ ‘لیکرپی ،ڈی،پی شامل ہوئی تھی اُس میں کامیابی نہ ملنے کے اسباب پر اگر چہ مفتی محمد سعید نے کافی غور و خوض کیا مگر اندرون پارٹی چند خود غرض عناصر نے سچائی پر پردہ ڈالنے کی از بس کوششیں جاری رکھیں ۔ووٹ بی جے پی کے خلاف حاصل کیا گیامگر افسوس کہ’’ترقی اور فنڈز‘‘کے نام پر ووٹ اور ووٹرکی بے حرمتی کی گئی ۔طول دینے اور ٹال مٹول کے حربوں سے ساٹھ اور ستر کے عشرے میں لوگ بیوقوف بنتے تھے مگر 1990ء کے بعد کشمیری نوجوانوں نے اس روش کو ہی طلاقِ ثلاثہ دے رکھی ہے۔ طوالت کے حربوں سے حکومتی بے چارگی کے تاثر کو قائم کرتے ہو ئے مفتی اینڈ کمپنی بی جے پی کے ساتھ حکومت بنانے میں کامیاب تو ہوئی مگر ’’نہ خدا ہی ملا نہ وصالِ صنم ‘‘ کے مترادف نہ مسئلہ کشمیر پر پیش رفت ہوئی نا ہی مفتی سعید کی موت تک ترقیاتی فنڈز کا اجراء ہو پایا، یہاں تک کہ کچھ سیاسی پنڈت مفتی سعید کی بیماری کو چانکیائی حربوں کے ذریعے انہیں دق کرکے مارنے کے شرمناک افواہیں پھیلانے سے بھی نہیں چوکے !اس کے بعد پارٹی کے بکھراؤ کے خدشات پر قابو پاتے ہو ئے جب ان کی بیٹی نے وزارتِ اعلیٰ کی کرسی سنبھالی تو مسئلہ کشمیر کے حل،پاک بھارت مذاکرات،قیدیوں کی رہائی ،جنگ بندی،حریت لیڈران پر قدغنوں کا خاتمہ اورپولیس کی زیادتیوں پر کنٹرول کے برعکس ہر مسئلہ چاہیے وہ سیاسی ہو یا سماجی یا مذہبی ان پر زوردار بیان داغنے کو اولیت دی گئی ۔حد یہ کہ جو کسر وہ باقی چھوڑتی تھی اس کو پورا کرنے کی قسم نعیم اختر نے کھائی تھی اور دونوں حضرات یہ سمجھ بیٹھے ہیں کہ سیاست تو میری گھٹی میں پڑی ہے رہا مذہب تو ہم سے بڑھ کر مذہبی کوئی نہیں لہٰذامفتی سعید کی طرح خاموش رہنے یا عقلمندوں کی طرح کسی سے پوچھنے اور مشورہ کرنے کے برعکس ایسے بے سروپا بیانات دینے شروع کیے گئے کہ درجہ دوم کے عقل مند بھی چکرا گئے کہ یا الٰہی ماجرا کیا ہے ؟اور پھر 2016ء کے چھے مہینوں میں بیان بازیوں سے جلتے الاؤ پرپیٹرول چھڑک کر بپھرے ہوئے نوجوانوں اور حریت لیڈران کی ذاتی اورخاندانی مسائل کو زیر بحث لاکر ایسے بیانات دیے گئے جس نے زخموں پر مرچیں چھڑکنے کا کام انجام دیدیا اور ایک اجتماعی آواز گونج اٹھی کہ اب تو ناقابلِ فراموش سبق دیے بغیر چارہ نہیں اور اس جواب کی پہلی کڑی چھ فیصد بجواب پانچ فیصد آہی چکا ہے ۔
پی ،ڈی،پی نے2010ء کے ایجی ٹیشن میںحکومت پر زیادتیوں کو لیکر ایسا ہنگامہ برپا کر رکھا تھا اور ایسے سخت بیانات جاری کرنے کی ایک روایت قائم کی کہ عمر عبداللہ سمجھ نہیں پا رہا تھا کہ کس کو کیسے کنٹرول کرے ۔علی محمد ساگر نے ایک ٹیلی ویژن چینل پر بات کرتے ہو ئے حالات خراب کرنے والے سیکورٹی افسران کو کالے بھیڑیے تک قرار دیدیا تھا مگر وہ پی،ڈی،پی جس کی بنیاد ہی مظالم کے خلاف آواز اٹھانے کے طور پر پڑی تھی حتیٰ کہ اس نے اپنے آغاز میں اپنی اس شناخت کو قائم رکھتے ہو ئے کوئی نرمی نہیں دکھائی مگر پھر ہوا وہی جو نیشنل کے ساتھ ہوا کہ آزادی کا نعرہ بلند کرنے والے شیخ صاحب سے لیکر عمر عبداللہ تک ہر فرد نے اسی تصور آزادی کو سختی کے ساتھ کچلنے میں کوئی کمی نہیں چھوڑی ۔مقام حیرت یہ ہے کہ اب بھی پی،ڈی،پی یہ سمجھنے سے قاصر ہے کہ وہ کس طرح کشمیر نا صحیح کم سے کم جنوبی کشمیر میں غم و غصہ ٹھنڈا کرسکے!الٹا یہ لوگ بے سروپا بیانات سے ماحول کو اور خراب کر دیتے ہیں حتیٰ کہ تصدق ابن مفتی سعید یہ حیرت انگیز انکشاف کر کے’’کہ مجھے نہیں معلوم تھا کہ عوام میں اس قدر غم وغصہ موجود ہے‘‘ ثابت کر چکا ہے کہ ان حضرات کے پاس اب کھولی خالی بیان بازی کے لیے بھی مناسب الفاظ نہیں ملتے ہیں حالانکہ یہ سبھی حضرات اسی زمین پر رہنے والے باشندے ہیں کسی دوسرے سیارے پر رہنے والے شہزادے نہیں آخر انہیں کشمیر کے عام انسان کے بالکل برعکس عوامی موڈ پہچاننے میں غلطی کیوں ہوتی ہے ۔
اپریل2017ء کے الیکشنوں نے جہاں ہندوستان اور مین اسٹریم کو آئینہ دکھادیا وہیں یہ بھی ثابت ہوا کہ اگر بھارت حریت قیادت کو الیکشنوں میں قید و بندمیں رکھنے کے بجائے کھلااور آزاد چھوڑ دے تو شایدکشمیر میں الیکشنوں کا حال اسے بھی زیادہ برا نظر آجائے اور الیکشن بائیکاٹ مہم سچ میں بھارت کے لیے ہر بار ریفرنڈم ثابت ہو جائے گا۔جنوبی کشمیر پی ڈی پی کے ہاتھ سے نکلتا جارہا ہے اورجذبہ آزادی روز بہ روز راسخ ہو تا جا رہا ہے۔نوجوان نسل کا اصرار ہے کہ باربار مرنے سے بہتر ہے ہم یکبارگی مر جائیں اس لیے کہ جب ہم نے اپنے حق کے لیے بندوق اٹھائی تو انہوں نے پرامن جدوجہدکا راگ الاپنا شروع کردیااور اب جب ہم پر امن طور پر سامنے آگئے تو ہم پرپیلٹ چلاکر آنکھیں ہی چھین لی جاتی ہیں تو سوال پیدا ہوتا ہے کہ جب آپ بندوق اور پر امن احتجاج کو دہشت گردی کے ساتھ نتھی کرتے ہو ئے ایک ہی چیز قرار دیتے ہیں تو ہمارے پاس پر تشدد راستہ اختیار کیے بغیر کوئی چارہ نہیں رہتاہے اور اب نوجوان نسل پر تشدد راستوں پر چلنے کی اس لیے عادی ہو چکی ہے کہ حکومت نوجوانوں کی اس آواز کے مسلمہ لیڈر شپ میں سید علی گیلانی جیسے کمزور ،نحیف اور بیماری کے ہجوم میں گرے ہوئے شخص کو جب چھ برس تک نظر بند رکھ سکتی ہے تو اس کی پالیسی نوجوانوں سے متعلق کیسی سخت ہو گی ؟

جنوبی کشمیر کے دہشت ناک حالات کی اصل کہانی

متعلقہ خبریں

اشتہار

اشتہار